ՊՊԾ գնդում ոստիկանի սպանության համար մեղադրանք է առաջադրվել «Սասնա ծռերի» անդամին

15:48 • 16.11.16

Հուլիսի 17-ին Ոստիկանության պարեկապահակային ծառայության (ՊՊԾ) գնդի տարածքը գրաված զինված խմբի անդամ Արմեն Բիլյանին մեղադրանք է առաջադրվել նաև ոստիկան Գագիկ Մկրտչյանի սպանության և զենքի շորթման համար։

Այս մասին Tert.am-ի հետ զրույցում ասաց Արմեն Բիլյանի պաշտպան Արմինե Ֆանյանը:

«Արմեն Բալյանին մեղադրանք է առաջադրվել ՀՀ քրեական օրենսգրքի 238-րդ հոդվածի 4-րդ մասի 1-ին ու 2-րդ կետերով և 104-րդ հոդվածի 2-րդ մասի 1-ին, 2-րդ, 3-րդ և 11-րդ կետերով: Առաջադրված մեղադրանքը Արմեն Բիլյանը չի ընդունում»,-ասաց նա։

Նշենք, որ 104-րդ հոդվածի հատկանիշներով Արմեն Բիլյանը մեղադրվում է  սպանություն կատարելու մեջ՝ երկու կամ ավելի անձանց, անձի կամ նրա մերձավորի՝ կապված այդ անձի կողմից իր ծառայողական գործունեության կամ հասարակական պարտքի կատարման հետ, զուգորդված՝ մարդուն առևանգելով կամ պատանդ վերցնելով և այլ հանցանքը թաքցնելու կամ դրա կատարումը հեշտացնելու նպատակով:

Քրօրի 238-րդ հոդվածի 4-րդ մասի 1-ին ու 2-րդ կետերը սահմանում են՝ զենք, ռազմամթերք, պայթուցիկ նյութեր կամ պայթուցիկ սարքեր հափշտակելը կամ շորթելը կազմակերպված խմբի կողմից և կյանքի կամ առողջության համար վտանգավոր բռնություն գործադրելով կամ դա գործադրելու սպառնալիքով:

Հիշեցնենք, որ բացի այս մեղադրանքները, Արմեն Բիլյանին մեղադրանք էր առաջադրվել ՀՀ քրեական օրենսգրքի 218 հոդվածի 3-րդ մասի առաջին կետով՝ կազմակերպված խմբի կողմից պատանդ վերցնելն ու պահելը և 235 հոդվածի 3-րդ մասով՝ կազմակերպված խմբի կողմից հրազեն, ռազմամթերք, պայթուցիկ նյութեր ձեռք բերելը, կրելը:

Հիշեցնենք, որ «Սասնա ծռեր» զինված խմբի կողմից ՊՊԾ գնդի տարածքը գրավելու ժամանակ հրազենային վերքեր ստացած Գագիկ Մկրտչյանը մահացել է հիվանդանոցում: