ՆԱՏՕ-ի հետ համագործակցության խորացման աստիճանը ՀՀ ակտիվությունից է կախված. Ջեյմի Շի

11:20 • 17.11.16

Հայաստանի մասնակցությունը ՆԱՏՕ-ի աշխատանքներին գերազանց է: Այս մասին ասաց ՆԱՏՕ-ի գլխավոր քարտուղարի փոխօգնական Ջեյմի Շին՝ Հայաստանի և ՆԱՏՕ-ի միջև Երևանում անցկացվող «Գիտություն՝ հանուն խաղաղության և անվտանգության» ծրագրի շրջանակներում:

«Ասում են, որ հաջողության 80 տոկոսը ձևացնելու մեջ է: Հայաստանի գերազանց մասնակցությամբ այս ծրագրում կցանկանայի ընդգծել, թե ինչն է մեզ համար առանցքային: Հայաստանը մեր ամենահին գործընկերներից է: Մեզ հետ համագործակցությունը սկսվել է շատ վաղուց, դեռ ստեղծման փուլում արդեն իսկ Հայաստանը ներկա էր մեր շարքերում: Ամենևին էլ պարտադիր չէ, որ երկրները լինեն ՆԱՏՕ-ի անդամ, որ արդյունավետ համագործակցեն մեզ հետ, որ օգտակար լինեն Դաշինքին»,- նշեց Ջեյմի Շին:  

ՆԱՏՕ-ի գլխավոր քարտուղարի փոխօգնականն ասաց, որ Հայաստանի հետ համագործակցությունը բոլոր տեսանկյուններից դրական է:

«Մենք ամեն ինչ կանենք՝ աջակցելու ձեզ, զարգացնելու ձեր ուժերը: Մենք ունեցել ենք անցյալի լավ առաջընթաց, բայց չպետք է բավարարվենք սրանով, պիտի մեծ թափով զարգացող առաջընթաց ունենանք ապագայում: Այս տարիներին մենք հասկացել ենք, որ ցանց է պահանջում ցանցին հաղթելու համար: Սա այն դասն է, որ քաղեցինք Աֆղանստանում: Մենք հասկացանք, որ ռազմական բաղադրիչը պարտադիր է, բայց ոչ բավարար: Մի աշխարհում, որտեղ ամեն ինչ շատ արագ է փոխվում, նոր գործիքներ են պետք դիմագրավելու մարտահրավերներին, մենք պետք է փորձենք կանխատեսել, թե որտեղից է գալիս վտանգը»,- մանրամասնեց Շին:

Նա առանձնացրեց նաև հայ զինվորների աշխատանքը Աֆղանստանում և Կոսովոյում. «Մենք մեծապես գնահատում ենք այն, որ Հայաստանը մեզ հետ է Աֆղանստանում, որտեղ 121 զինվոր կա, Կոսովոյում, որտեղ շուրջ 40 հոգի կա: Ձեր զինվորները գերազանց են կատարում իրենց աշխատանքը»։

Վերջում նա նշեց, որ համագործակցության արդյունավետության համար երկու կողմի ակտիվ աշխատանքն է հարկավոր. «Տանգո պարելու համար երկու հոգի է պետք: Այս պիեսում գործընկեր է հարկավոր: Հետևաբար, նաև ձեր ակտիվությունից է կախված համագործակցության խորացման աստիճանը»: