Ժիրայր Սեֆիլյանի և 8 մեղադրյալի գործն առանձնացվել է ՊՊԾ գնդի գործից և նախաքննությունն ավարտվել է
2016 թվականի մայիսի 20-ին Երևանի Հալաբյան փողոցում տեղի ունեցած ավտովթարի մասնակից «Մերսեդես Բենց» մակնիշի ավտոմեքենայի բեռնախցիկում հրազեն հանդիսացող երկու ինքնաձիգ և ռազմամթերք հանդիսացող փամփուշտներ հայտնաբերելու դեպքի առթիվ հարուցված քրեական գործը միացվել էր ՊՊԾ գնդի գրավման գործին, իսկ այժմ այդ գործի վերաբերյալ ավարտ է հայտարարվել, և այն կուղարկվի դատարան:
Այս մասին Tert.am-ի հետ զրույցում ասաց Ժիրայր Սեֆիլյանի գործով անցող Ներսես Պողոսյանի պաշտպան Արայիկ Պապիկյանը. «9 հոգու գործի ավարտ է հայտնվել, և գործն առանձնացվել է ՊՊԾ գնդի քրգործից: 9 հոգու գործը շուտով կուղարկվի դատարան»:
Հիշեցնենք, որ մայիսի 20-ի դեպքի առթիվ քրեական գործ էր հարուցվել ՀՀ քրեական օրենսգրքի 235-րդ հոդվածի 2-րդ մասով՝ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը, որոնք կատարվել են մի խումբ անձանց կողմից նախնական համաձայնությամբ։
Նշենք, որ այս քրեական գործի շրջանակներում մեղադրանք է առաջադրվել Հովհաննես Պետրոսյանին, Ներսես Պողոսյանին, Հրայր Թոփչյանին, Աշոտ Գուգուշյանին, Գալուստ Գրիգորյանին, Սասունիկ Կիրակոսյանին, Արթուր Մովսիսյանին, ով գտնվում է հետախուզման մեջ և Սմբատ Գալոյանին, ում նկատմամբ խափանման միջոց է ընտրվել չհեռանալու մասին ստորագրությունը:
Մի խումբ անձանց կողմից ապօրինի կերպով զենք և ռազմամթերք ձեռք բերելը, փոխադրելը և պահելը կազմակերպելու կասկածանքով 2016թ. հունիսի 20-ին Ժիրայր Սեֆիլյանը ձերբակալվել է և մինչ այժմ շարունակում է մնալ կալանավորված:










