Նոբելյան մրցանակակիր Բոբ Դիլանը կարող է դասախոսություն կարդալ Ստոկհոլմում 2017 թվականին

Շվեդական ակադեմիան ընթացիկ տարում ավանդական գրականության թեմայով դասախոսության փոխարեն որևէ այլ միջոցառում չի անցկացնի, սակայն հույս ունի, որ 2016 թվականի մրցանակակիր Բոբ Դիլանը 2017 թվականին կժամանի Ստոկհոլմ: Այս մասին հաղորդում է ТАСС-ը` հղում անելով ակադեմիայի մամուլի հաղորդագրությանը:

«Շվեդական ակադեմիան որոշել է Նոբելյան դասախոսության փոխարեն այլընտրանքային միջոցառում չանցկացնել: Հնարավոր է, որ հաջորդ տարվա գարնանը Բոբ Դիլանը ելույթ ունենա Ստոկհոլմում, և այդ դեպքում նա դասախոսություն կարդալու հիանալի հնարավորություն կունենա»,- ասվում է հաղորդագրության մեջ:

Անցած հինգշաբթի Շվեդական ակադեմիան տեղեկացրել է, որ Բոբ Դիլանը չի ժամանի Ստոկհոլմում կայանալիք մրցանակաբաշխության արարողությանը: Այս մասին Դիլանն ակադեմիային տեղեկացրել է նամակով, բացատրելով, որ զբաղվածության պատճառով չի կարողանա ժամանել Ստոկհոլմ:


Հիշեցնենք, որ 2016 թվականին գրականության ոլորտում նոբելյան մրցանակը շնորհել են ամերիկացի երաժիշտ և հեղինակ-կատարող Բոբ Դիլանին: