Մենք մեր քաղաքացիներին չենք արտահանձնում. Ուկրաինայի գլխավոր դատախազը Սաակաշվիլիի արտահանձնման մասին

17:56 • 18.11.16

Ուկրաինայի գլխավոր դատախազ Յուրի Լուցենկոն հերքել է տեղեկությունը, որ Միխեիլ Սաակաշվիլիին կարող են արտահանձնել Վրաստանին: Այդ մասին հայտնում է «Ուկրաինսկայա պրավդա»-ն՝ վկայակոչելով Ուկրաինայի գլխավոր դատախազի խոսքերը:


«Ուկրաինան իր քաղաքացիներին այլ երկրների չի արտահանձնում: Վերջակետ»,- ասել է նա:


Ավելի վաղ «Ուկրաինսկայա պրավդա»-ին աղբյուրը հայտնել է, որ Ուկրաինայի նախագահի շրջապատում քննարկվել է Վրաստան Օդեսայի շրջանի նախկին նահանգապետ Միխեիլ Սաակաշվիլիի արտահանձնման հարցը:


Աղբյուրը նշել է, որ իշխանությունները չեն կարող օրենքով Սաակաշվիլիին զրկել քաղաքացիությունից: Այդ առնչությամբ Կիևը դիտարկում է նախկին նահանգապետի արտահանձնման հարցը:


Հիշեցնենք, որ Սաակաշվիլու դեմ Վրաստանում քրեական գործ է բացված:


Ավելի վաղ հաղորդվել է, որ Ուկրաինայի Օդեսայի շրջանի նախկին նահանգապետ Միխեիլ Սաակաշվիլին հայտարարել է, որ երկրի նախագահ Պյոտր Պորոշենկոն իբր մտադիր է զրկել իրեն ուկրաինական քաղաքացիությունից: Այդ մասին Սաակաշվիլին գրել է Facebook-ի իր էջում՝վկայակոչելով «շատ լավ տեղեկացված աղբյուրի»:


Պորոշենկոն ազատել է Սաակաշվիլիին Օդեսայի նահանգապետի պաշտոնից նոյեմբերի 9-ին: Նա Օդեսայի նահանգապետ էր նշանակվել 2015 թվականի մայիսի 30-ին:


Սաակաշվիլին Ուկրաինայի քաղաքացիություն է ստացել 2015 թվականի մայիսի 29-ին: