iOS-ի թարմացումը վնասակար է iPhone-ի մարտկոցների համար. օգտատերեր

iPhone սմարթֆոնի օգտատերերը, որոնք իրենց սարքերի ծրագրային ապահովումը թարմացրել են մինչև iOS 10.1.1 տարբերակը, սկսել են զանգվածաբար բողոքել սարքերի մարտկոցի հետ առաջացած խնդիրներից. սմարթֆոնները սկսել են ավելի արագ լիցքաթափվել և տաքանալ:

Mashable-ը գրում է, որ նոր ծրագրային ապահովմամբ հագեցած սմարթֆոնները սկսել են սխալ գնահատել մարտկոցի լիցքավորման մակարդակը: Ամբողջությամբ լիցքավորված հեռախոսը կարող է հաշված ժամերում լիցքաթափվել: Լիցքավորման սարքին միացնելուց հետո լիցքավորման մակարդակը կարող է զգալիորեն բարձրանալ և հետո կրկին իջնել: Դրանից բացի, մարտկոցը սկսել է տաքանալ ավելի ուժեղ, քան նախկինում:

Նշվում է, որ կարգավորումները նախնական վիճակի բերելը, ծրագրերի թարմացումը և ստիպողաբար վերբեռնումը չեն հեռացնում անսարքությունը: Մասնագետները խորհուրդ են տալիս iTunes-ի միջոցով ևս մեկ անգամ ներբեռնել iOS 10.1.1 տարբերակը կամ տեղադրել iOS 10.2. բետա տարբերակը: