Հայոց ցեղասպանությունը դատապարտող բանաձևի ընդունման հարցը Չեխիայի օրակարգում է. դեսպան

22:05 • 01.12.16

Չեխիան քննարկում է Հայոց ցեղասպանությունը դատապարտող բանաձևի ընդունման հարցը: Tert.am-ի հետ զրույցում ասաց ՀՀ-ում Չեխիայի արտակարգ և լիազոր դեսպան Պետր Միկիսկան:

Չեխիայի նախագահ Միլոշ Զեմանը դեռևս հունիսին Հայաստան այցի ժամանակ դիմելով իր երկրի խորհրդարանին և կառավարությանը կոչ էր արել ընդունել Հայոց ցեղասպանությունը դատապարտող բանաձև: Այս առումով հետաքրքրվեցինք՝ դրական տեղաշարժ կա՞:

Պետր Միկիսկան պատասխանեց, որ հարցը քննարկվել է բավական էմոցիոնալ մակարդակում, նախագահն առաջարկ արել է, խորհրդարանի խմբակցությունները ներքին կարգով հարցը քննարկել են, բայց հրապարակային քննարկման հարցը դեռևս չի դրվել:

«Մեր նախագահը հանդիպել է նաև Չեխիայի վարչապետի, ԱԳ նախարարի հետ, նրանց էլ առաջարկել Հայոց ցեղասպանությունը դատապարտող բանաձև ընդունել, ինչը ևս դեռևս հրապարակային չէ: Գործընթացը գնում է, թե երբ հրապարակային քննարկում կլինի՝ դժվար է ասել, ամեն դեպքում հարցը օրակարգում է»,– ասաց նա:

«Պետք է նշեմ, որ Չեխիայում կան նաև քաղաքական ուժեր, որոնք կողմ չեն այս բանաձևի ընդունմանը, խորհրդարանում ոչ բոլորն են կողմնակից»,- նշեց դեսպանը՝ շեշտելով, որ Չեխիայի խորհրդարանի մեծամասնությունը, սակայն, Հայոց ցեղասպանությունը դատապարտող բանաձևի ընդունմանը կողմնակից է:

Այնուամենայնիվ, Պետր Միկիսկան ասաց, որ քանի դեռ հարցը հրապարակային չի քննարկվել, դժվար է ասել, թե իրականում ովքեր են կողմ ու ովքեր դեմ այս բանաձևի ընդունմանը:
 
Դիվանագետը նաև նշեց, որ հայտնի չէ, թե երբ կքննարկվի հարցը: «Ամեն դեպքում դժվար է ասել, որ մեկ ամսից օրինակ կքննարկվի, նման նախաձեռնություն չկա»,- հավելեց Հայաստանում Չեխիայի դեսպանը: