Աթամբաևը հայտարարել է, որ մեկ տարուց կհեռանա Ղրղզստանի նախագահի պաշտոնից

14:12 • 01.12.16

Ղրղզստանի նախագահ Ալմազբեկ Աթամբաևը վստահեցրել է, որ ուղիղ մեկ տարուց կհեռանա իր պաշտոնից, և երկրում իշխանափոխություն տեղի կունենա, գրում է «ՌԻԱ Նովոստի»-ն:


Աթամբաևը Ղրղզստանի նախագահ է ընտրվել 2011 թվականին, այդ պաշտոնին նրա լիազորությունների ժամկետն ավարտվում է 2017 թվականի վերջին:


«Այսօր արդեն վեցերորդ տարին է, ինչ ես նախագահ եմ: Կարծում եմ՝ Ղրղզստանի քաղաքացիների օգնությամբ շատ բան է հաջողվել անել: Այժմ մենք բոլորովին այլ երկիր ունենք: Մեկ տարուց ես կհեռանամ այս աշխատանքից, և երկու-երեք տարուց ավելի պարզ կլինի, թե ինչ է հաջողվել անել»,- հայտարարել է Ղրղզստանի նախագահը տարվա արդյունքներով մամուլի ասուլիսի ժամանակ:


Աթամբաևը հայտնել է, որ չգիտի, թե ով կընտրվի հաջորդ տարի, բայց «կարևորն այն է, որ նա չկարողանա երկիրը հետ տանել»: Նա նշել է, որ իր համար միևնույն է, թե ով կգա իշխանության՝ նախագահական Սոցիալ-դեմոկրատական, թե ընդդիմադիր կուսակցության ներկայացուցիչը, «կարևորը, որ լինի համակարգային, լուրջ աշխատող կուսակցություն»:


Ավելի վաղ հաղորդվել է, որ Ղրղզստանի նախագահ Ալմազբեկ Աթամբաևը հայտարարել է, որ ռուսական ռազմաբազան պայմանագրի ժամկետի ավարտից հետո դուրս կբերվի երկրից: 


«Մենք Ռուսաստանի հետ միշտ կլինենք ռազմավարական գործընկերներ, բայց Ղրղզստանն ապագայում պետք է հենվի և հույսը դնի միայն իր զինված ուժերի վրա, այլ ոչ Ռուսաստանի, Ամերիկայի կամ այլ երկրի բազաների: Մենք պետք է կառուցենք սեփական բանակը»,- հայտարարել է Աթամբաևը:


«Մենք թողեցինք միայն 15 տարով… Դա եղավ իմ նյարդերի հաշվին, դա դուր չէր գալիս շատ ռուս նախարարների, բայց այդ հարցի շուրջ հասա Վլադիմիր Պուտինի ըմբռնմանը»,- նշել է Աթամբաևը: