Փարիզի, Աթենքի, Մադրիդի և Մեխիկոյի քաղաքապետերը պայմանավորվել են դիզելային մեքենաներն արգելելու մասին
Աթենքի, Մեխիկոյի, Մադրիդի և Փարիզի քաղաքապետերը պայմանավորվել են, որ մինչև 2025 թվականը կարգելեն դիզելային ավտոմեքենաներն ու բեռնատարները, գրում է BBC-ի ռուսական ծառայությունը:
Դրա փոխարեն նրանք խոստացել են խթանել այլընտրանքային տրանսպորտային միջոցների՝ էլեկտրամոբիլների, հիբրիդային և ջրածնային ավտոմեքենաների օգտագործումը:
Քաղաքապետերը նաև խոստացել են քաղաքներում զբոսանքի գոտիներ ստեղծել ու զարգացնել հեծանվային ենթակառուցվածքը:
Մեխիկոյում նաև խոստացել են շարունակել զարգացնել հանրային տրանսպորտը:
Այդ խոստումները քաղաքապետերն արել են Մեխիկոյում, որտեղ անցկացվում է համաշխարհային քաղաքների քաղաքապետերի հանդիպումը:
Վերջին ժամանակներս դիզելային ավտոմեքենաները ենթարկվում են քննադատության՝ օդի որակին և մարդկանց առողջությանը հասցրած վնասի պատճառով:










