2010-2016թթ. ընթացքում Հայաստանի բնակչության թվաքանակն աճել է 0.3%-ով. ՄԱԿ-ի Բնակչության հիմնադրամի զեկույցը
ՄԱԿ-ի Բնակչության հիմնադրամը ներկայացրել է նոր զեկույց, որում ամփոփված տվյալների համաձայն՝ Հայաստանում ապրում է 3 մլն մարդ: Նշվում է, որ 2010-2016թթ. ընթացքում մեր երկրի բնակչության թվաքանակն աճել է 0.3%-ով:
Հայտնի է, որ 2016թ. տվյալներով՝ 0-14 տարեկանները կազմում են ողջ բնակչության 19%-ը, նույն ցուցանիշն է նաև 10-24 տարեկանների շրջանում:
Ինչ վերաբերում է 15-64 տարիքային խմբին, ապա այն կազմում է բնակչության 70%-ը, իսկ 65 և դրանից բարձր տարիքային խումբը՝ 11%:
Զեկույցի համաձայն՝ ՀՀ բնակչության 45.2%-ը չի աշխատում (այդ թվում ներառված են երեխաները, հաշմանդամները, ուսանողներն ու տարեց մարդիկ):
Նշվում է նաև, որ Հայաստանում կանանց կյանքի միջին տևողությունը 79 տարի է, իսկ տղամարդկանցը՝ 74:
Ինչ վերաբերում է աշխարհին, ապա, ըստ զեկույցի, 2016թ. Երկրի վրա ապրող մարդկանց թիվը հասել է 7.43 մլրդ-ի:
Փաստաթղթի հեղինակներն ընդգծել են, որ, ի տարբերություն 2015թ., այս ցուցանիշն արձանագրել է 1.1%-ի աճ: Հայտնի է, որ նախորդ տարի Երկրի ողջ բնակչությունը եղել է 7.34 մլրդ մարդ:
Զեկույցում նշվում է նաև, որ աշխարհի բնակչության մոտ 26%-ը մինչև 14 տարեկաններն են:
Բացի այդ, զեկույցի հեղինակներն արձանագրել են, որ Երկրի՝ մինչև 24 տարեկան բնակիչների գրեթե կեսն առնչվում է արական սեռի օգտին արվող գենդերային խտրականության խնդրին:










