Եվրոպոլը նախազգուշացնում է Եվրոպայում նոր ահաբեկչությունների վտանգի մասին

12:07 • 02.12.16

ԵՄ Ոստիկանական ծառայությունը՝ Եվրոպոլը, նախազգուշացնում է, որ «Իսլամական պետություն» ահաբեկչական խմբավորումը պատրաստվում է մոտ ապագայում նոր հարձակումներ գործել Եվրոպայում: Սիրիայում և Իրաքում ծայրահեղականների կողմից տարածքներ կորցնելու պատճառով մեծանում է Արևմտյան Եվրոպայում նոր ահաբեկչությունների վտանգը: Այդ մասին ասված է ուրբաթ Հաագայում հրապարակված Եվրոպոլի հակաահաբեկչական կենտրոնի զեկույցում, գրում է Deutsche Welle-ի ռուսական ծառայությունը:


«ԻՊ-ի տեսակետից 2015 և 2016 թվականներին Բելգիայում և Ֆրանսիայում իրականացված ահաբեկչությունները հաջող և արդյունավետ են եղել»,- նշվում է փաստաթղթում: «Հաշվի առնելով այդ փաստը և այն, որ ահաբեկչական խմբավորումն այժմ էլ ունի հնարավորություններ հարվածներ հասցնելու համար՝ Եվրոպայում պահպանվում է մոտ ապագայում ինչպես անհատների, այնպես էլ խմբերի կողմից նոր հարձակումների հնարավորությունը»,-ասվում է զեկույցում:


Նշվում է, որ ահաբեկչական գործողությունների վտանգն առավել բարձր է Ֆրանսիայում: Այնուամենայնիվ, ահաբեկչությունների վտանգը գոյություն ունի «ոչ միայն Բելգիայում և Ֆրանսիայում, այլև բոլոր այն երկրներում, որոնք մասնակցում են ԻՊ-ի դեմ պայքարին՝ ԱՄՆ-ի կողմից ձևավորված կոալիցիայի շրջանակում»:


Հատուկ ծառայությունների գնահատմամբ՝ այժմ եվրոպական երկրներում կարող են գտնվել ԻՊ-ի տասնյակ պոտենցիալ ահաբեկիչներ:


Կազմակերպության տվյալներով՝ «առավել հնարավոր սցենարը նույն ռազմավարության, այդ թվում՝ նույն զենքի օգտագործումն է, ինչ նախորդ հարձակումների ժամանակ»: