Լավրովը Հալեպում ստեղծված իրավիճակի համար ԱՄՆ-ին է մեղադրել
Արևելյան Հալեպում ստեղծված իրավիճակն այն բանի հետևանքն է, որ Վաշինգտոնին չի հաջողվել տարանջատել ընդդիմությունը «Ջեբհաթ ան-Նուսրա» խմբավորումից:
РИА Новости-ի հաղորդմամբ`այս հայտարարությամբ հանդես է եկել ՌԴ ԱԳ նախարար Սերգեյ Լավրովը՝ ելույթ ունենալով «Միջերկրածովյան տարածաշրջան. Հռոմեական երկխոսություն» միջազգային համաժողովի ժամանակ:
Նա մատնանշել է, որ ԱՄՆ-ն նման պարտավորություն ստանձնել է դեռևս հունվարին` հավատացնելով, որ «բառացիորեն մի քանի շաբաթվա ընթացքում կկարողանա ազատվել այդ խմբավորումներից»:
«Դրան պետք է հաջորդեր քաղաքական գործընթացը, հումանիտար հարցերի կարգավորումը, ընդդիմության տարբեր խմբերի մասնակցությունը բանակցություններին»,- ընդգծել է Լավրովը:
ՌԴ արտգործնախարարը հիշեցրել է, որ որոշ ժամանակ առաջ ՄԱԿ-ի՝ Սիրիայի հարցով հատուկ դեսպանորդ Ստաֆան դե Միստուրան առաջարկել է դուրս բերել «Ան-Նուսրայի» գրոհայիններին Հալեպից, իսկ «Մոսկվան հավանություն էր տվել այդ առաջարկին` չնայած, որ ահաբեկչության դեմ պայքարը մենք առաջնային ենք համարում»:
Սակայն, որոշ երկրներ, Լավրովի խոսքով, դեմ հանդես եկան այդ առաջարկին:










