Հայ-ռուսական միացյալ զորամիավորումն ուղղված չէ երրորդ կողմի դեմ. Վաղարշակ Հարությունյան

12:43 • 02.12.16

ՀՀ պաշտպանության նախկին նախարար Վաղարշակ Հարությունյանն այսօր մամուլի ասուլիսին անդրադարձավ Մոսկվայում օրերս ստորագրված հայ-ռուսական միացյալ զորամիավորման մասին համաձայնագրին՝ նշելով, որ այն բնական շարունակությունն է բազայի պայմանագրի, որը գործում է վաղուց։

Նա ասաց, որ այս համաձայնագրի առաջին նորությունն այն է, որ եթե նախկինում զորամիավորման կարգավորման հարցը լուծվում էր նախարարությունների մակարդակով, այժմ ավելի է հստակեցվել և միջպետական մակարդակի է բերվել:

«Այս պայմանագրում հստակ գրված է, որ այս խմբավորումը գործում է բազայի պայմանագրով և հայ-ռուսական պայմանագրով՝ կնքված 1997 թվականին, որտեղ խոսվում է, որ այս ամենը գործում է Հայաստանի դեմ ագրեսիայի դեպքում և խոսք չի կարող լինել այն մասին,որ այս զորամիավորումը կարող է գնալ Սիրիա կամ այլ պետություն»,-ասաց նա։

Վաղարշակ Հարությունյանը նշեց, որ պայմանագրում գրված է, որ այն ուղղված չէ երրորդ կողմի դեմ, այսինքն՝ այս զորամիավորումը չի կարող օգտագործվել Վրաստանի կամ այլ պետության դեմ: «Վերջնական որոշումն ընդունում է հայկական կողմը»,-ասաց նա:

Անդրադառնալով տեսակետներին, թե այս պայմանագրով մեծանում է Ռուսաստանի ազդեցությունը Հայաստանի վրա, Վաղարշակ Հարությունյանն ասաց, որ երբ Հայաստանը Ռուսաստանի հետ ստորագրեց բազայի պայմանագիրը, դա ունեցավ իր դրական ազդեցությունը, քանի որ Ռուսաստանը դրանից հետո ներքին գներով է զենք–զինամթերք վաճառում Հայաստանին: Ըստ նրա այս խոսակցություններն ուղղված են Ռուսաստանի դեմ։