ԵԱՀԿ-ում դեռևս չի հաջողվում համաձայնության հասնել ԼՂ-ում դիտորդների տեղակայման վայրի վերաբերյալ. Լավրով
ԵԱՀԿ-ում դեռևս չի հաջողվում համաձայնության հասնել Լեռնային Ղարաբաղում ԵԱՀԿ-ի դիտորդական առաքելության տեղակայման վայրի վերաբերյալ:
Այդ մասին Համբուրգում անցկացվող ԵԱՀԿ անդամ երկրների արտգործնախարարների խորհրդի 23-րդ նիստի շրջանակում ունեցած մամուլի ասուլիսի ժամանակ հայտարարել է Ռուսաստանի արտգործնախարար Սերգեյ Լավրովը, գրում է ТАСС-ը:
Նախարարի խոսքով՝ նախկինում ձեռք բերված պայմանավորվածությունները վերաբերել են ԵԱՀԿ-ի դիտորդների թվի ավելացմանը, ընդ որում՝ այդ թիվն ավելացել է ընդամենը յոթով:
«Այդ պայմանավորվածությունները պետք է ամրագրվեն ԵԱՀԿ-ի որոշումներում, բայց դա անելու համար անհրաժեշտ է համաձայնություն։ Դիտորդների թվի ավելացման վերաբերյալ փոխհամաձայնություն կա, բայց չկա փոխհամաձայնություն այն բանի վերաբերյալ, թե որտեղ են նրանք տեղակայվելու: Իմ կարծիքով՝ այդ դիտորդները պետք է տեղակայվեն շփման գծում, բայց դեռ չի ստացվում հասնել փոխհամաձայնության»,- ասել է Լավրովը:
Երեկ Ռուսաստանի Դաշնության արտգործնախարարը Համբուրգում հայտարարել էր, որ նախկինում ձեռք բերված պայմանավորվածություններին հավատարմությունը բոլոր բարդ հակամարտությունների, մասնավորապես` Լեռնային Ղարաբաղի կարգավորման բանալին է:
«Նախկինում ձեռք բերված պայմանավորվածություններին հավատարմությունը բոլոր բարդ հակամարտությունների, այդ թվում` Մերձդնեստրի և Լեռնային Ղարաբաղի կարգավորման բանալին է»,- ասել էր Լավրովը:
ՌԴ ԱԳ նախարարը նշել էր, որ ցանկացած հակամարտություն անհրաժեշտ է լուծել համաձայնեցված ձևաչափերով՝ կողմերի լիարժեք մասնակցությամբ, նրանց շահերի հավասարակշռության պայմանով։










