Շենգավիթի դատավորի դատական նիստը հետաձգվեց. գործով ամբաստանյալ փաստաբանը հանրային պաշտպանի կարիք ունի
Շենգավիթ վարչական շրջանի ընդհանուր իրավասության դատարանում մեկնարկեց կաշառք ստանալու մեջ մեղադրվող՝ Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանի և փաստաբան Էլզա Զաքարյանի գործով դատավարությունը՝ դատավոր Կարեն Մարդանյանի նախագահությամբ:
Դատավոր Մարդանյանը պաշտպանական կողմին հայտնեց, որ Դատախազությունից գրություն է ստացել այն մասին, որ մեղադրող դատախազի լիազորությունները փոխանցվել են Կարեն Բիշարյանին:
Այնուհետև դատարանը հինգ րոպե ընդմիջում հայտարարեց, որովհետև պաշտպանական կողմը ցանկացավ ծանոթանալ Դատախազության գրության հետ:
Դատական նիստի վերսկսումից հետո Իշխան Բարսեղյանի պաշտպաններից Վարդուհի Էլբակյանն ասաց, որ գրության մեջ հղում է կատարվել Դատախազության մասին օրենքի 26 հոդվածի 1-ին մասին, որում ասվում է, որ Կարեն Բիշարյանը լիազորվել է դատախազի լիազորություններով:
Վարդուհի Էլբեկյանի խոսքով՝ մեղադրող դատախազը պատշաճ կարգով չի լիազորվել. «Գլխավոր դատախազը պետք է ներկայանար դատական նիստին, և իր հետ որպես երկրորդ մեղադրող պետք է ներգրավեր Կարեն Բիշարյանին կամ ցանկացած այլ մեղադրողի»:
Դատարանն այդտեղ օրենքի խախտում չնկատեց և շարունակեց դատական նիստը:
Գործով ամբաստանյալ Էլզա Զաքարյանը դատարանին հայտնեց, որ հրաժարվում է իր պաշտպան Գևորգ Շիրինյանից և միջնորդություն է ներկայացնում իրեն հանրային պաշտպան տրամադրելու համար:
Ի դեպ, բացի իր 3 պաշտպաններից, Իշխան Բարսեղյանը ներգրավել էր ևս մեկ պաշտպանի՝ Կարեն Ղազարյանին:
Էլզա Զաքարյանին հանրային պաշտպան տրամադրելու համար դատարանը սահմանված ընթացակարգով պետք է դիմի Փաստաբանների պալատի Հանրային պաշտպանի գրասենյակ: Այդ պատճառով դատարանը որոշում կայացրեց հետաձգել դատական նիստը: Դատական նիստը հետաձգվեց, և հաջորդ նիստը նշանակվեց հունվարի 23-ին:
Հիշեցնենք, որ դատավոր Իշխան Բարսեղյանը իր վարույթում քննվող քաղաքացիական գործով կողմի օգտին որոշում կայացնելու համար պահանջել և 2016 թվականի հոկտեմբերի 27-ին քաղաքացի Հ. Դ.-ից Երևանի հետիոտնային գետնանցումներից մեկում անձամբ ստացել էր 1000 ԱՄՆ դոլար կաշառք:
Դեպքի առթիվ հարուցվել էր քրեական գործ 311-րդ հոդվածի (կաշառք ստանալը) 4-րդ մասի 3-րդ կետով՝ կաշառք ստանալը դատավորի կողմից՝ պատժվում է ազատազրկմամբ՝ յոթից տասներկու տարի ժամկետով՝ գույքի բռնագրավմամբ կամ առանց դրա:
Իշխան Բարսեղյանի կողմից 1000 ԱՄՆ դոլար կաշառք պահանջելու և ստանալու դեպքի կապակցությամբ Հատուկ քննչական ծառայությունում հարուցված գործի շրջանակներում ձերբակալվել է փաստաբան Էլզա Զաքարյանը:
Դատավոր Իշխան Բարսեղյանի պաշտպաններն են նախկին դատավոր Վլադիմիր Գրիգորյանը, Լիաննա Գրիգորյանը, Վարդուհի Էլբակյանն ու Կարեն Ղազարյան:










