Ադրբեջանական ձեռագիրը, որն արդեն ծիծաղելի է, փակուղի է մտցրել ԼՂ հակամարտության կարգավորման գործընթացը. Կարեն Բեքարյան
Լեռնային Ղարաբաղի հակամարտությունը սառեցված է: Այս մասին այսօր լրագրողների հետ զրույցում ասաց ԱԺ ՀՀԿ խմբակցության պատգամավոր, «Եվրոպական ինտեգրացիա» ՀԿ նախագահ Կարեն Բեքարյանը:
Ըստ պատգամավորի՝ տարվա ընթացքում բացի դիվանագիտական աշխատանքից, ականատեսը դարձանք ապրիլյան ռազմական գործողությունների, մարդկային ողբերգության, ինչը անդրադարձավ նաև բանակցային գործընթացի վրա:
«Ադրբեջանը նախաձեռնեց պլանավորած ռազմական գործողություն, պատերազմ: Նման իրավիճակից վերադարձը բանակցային սեղան նվազագույնը հեշտ չէ»,- նշեց Բեքարյանը՝ շեշտելով, որ Ադրբեջանը, կարծես թե, անպատժելի իրավիճակում է հայտնվել:
Կարեն Բեքարյանը կարևորեց ԵԱՀԿ մոնիթորինգային գրասենյակի ընդլայնումը՝ ընդգծելով, որ այդ գրասենյակն ունի փոքրաթիվ կազմ:
«Նրանք չունեն հնարավորություն հասնելու թեժ կետ, թեժ գոտի, ուստի նրանց արած գործողությունները լինում են պոստ ֆակտում, հետքերը փորձում են վերացնել և այլն, և այլն: Այս գրասենյակի ընդլայնումը կտա հնարավորություն նվազեցնելու լարվածությունը: Հնչեցրեց, որ կողմերի միջև կա պայմանավորվածություն, որ այո գրասենյակի ընդլայնումը պետք է լինի:
Սրանից հետո տեղի է ունենում այն, ինչ արդեն դարձել է ձեռագիր. Ադրբեջանը հրաժարվում է իր պայմանավորվածություններից: Հետին պլան են մղում... Սայլը տեղից չի շարժվում: Մենք տեսանք, որ ՌԴ ԱԳ նախարարը Համբուրգի հանդիպումից հետո հայտարարեց, թե կա համաձայնություն ընդլայնման քանակի հետ կապված, ի դեպ ծիծաղելի թվով, բայց նրանց տեղակայման վայրի վերաբերյալ տարակարծություններ կան: Ինչու եմ ասում ծիծաղելի, որովհետև 7 մարդով ավելացնելը այդ ամբողջ շփման գծում հասկանում եք, որ ոչինչ չի տա: Ավելի ծիծաղելի է, որ տեղակայման վերաբերյալ չկա համաձայնություն»,- մանրամասնեց Կարեն Բեքարյանը:
Պատգամավորի դիտարկմամբ՝ բանակցային գործընթացը սառեցված, փակուղային վիճակում է, որովհետև Ադրբեջանը պայմանավորվածությունները չի կատարում, որովհետև «ոչ ցանկություն ունի, ոչ կամք»:
Կարեն Բեքարյանը շեշտեց, որ վերադարձ պետք է արվի 94-95 թթ.-ի պայմանագրերին, որտեղ Լեռնային Ղարաբաղը կողմ է, հետաքննության մեխանիզմի բաղադրիչը պետք է ներդրվի, զուգահեռ՝ մեկնարկի բովանդակային բանակցային էլեմենտը:










