Թրամփը խոստացել է արաբական միապետությունների հաշվին Սիրիայում անվտանգության գոտիներ ստեղծել
ԱՄՆ նորընտիր նախագահ Դոնալդ Թրամփը խոստացել է Սիրիայում մարդասիրական անվտանգության գոտիներ ստեղծել ու ստիպել Պարսից ծոցի երկրներին վճարել դրա համար, գրում է «ՌԻԱ Նովոստի» գործակալությունը։
«Երբ ես տեսնում եմ, թե ինչ է կատարվում Սիրիայում, շատ եմ տխրում: Մենք պետք է օգնենք սիրիացի ժողովրդին»,- ասել է 70-ամյա հանրապետականը Հերշի քաղաքում ունեցած ելույթի ժամանակ՝ Սիրիայի համատեքստում հիշեցնելով նաև Պարսից ծոցի հարուստ պետությունների մասին:
«Ես նրանց կստիպեմ մեզ միջոցներ տրամադրել, որոնց հաշվին Սիրիայում անվտանգության գոտիներ կստեղծենք»,-նշել է նորընտիր նախագահը:
Ավելի վաղ Թրամփը հայտարարել էր, որ «անհրաժեշտ է վերջ տալ ներկայում Սիրիայում կատարվող խենթությանը»:
Նշենք, որ Թրամփի երդմնակալության արարողությունը կայանալու է հունվարի 20-ին:










