Ստամբուլի «Արաս» հրատարակչությունն Ամանորին ընդառաջ հայ մանուկների համար միջնադարյան թռչնագրով նկարազարդ գրքեր է թողարկել

15:44 • 19.12.16

Ստամբուլում գործող «Արաս» հայկական հրատարակչությունն Ամանորին ընդառաջ նոր յուրօրինակ նկարազարդ գրքեր է պատրաստել, որոնք միտված են Թուրքիայում ապրող հայ մանուկներին հայերեն այբուբենին ծանոթացնել միջնադրյան թռչնագրի միջոցով:

Նոր տպագրված գրքերն արդեն ներկայացվել են հրատարակչության պաշտոնական կայքում:

Հեղինակները թռչնագիր գրքերի հիմնական երեք հրատարակությունները վերնագրել են «Ազատություն», «Խաղաղություն» և «Արդարություն»:

Նշենք, որ թռչնագիրը զարդագրի տեսակ է, որի տառերը (հիմնականում գլխագիր) թռչունների պատկերներ են: Միջնադարյան հայկական ձեռագրերում թռչնագրով նշվում էր էջի կամ գլխի առաջին տառը: Հետագայում թռչնագրերը կիրառվել են տպագիր հրատարակություններում։

«Արաս» հրատարակչությունը հիմնադրվել է Ստամբուլում 1993թ.-ին: Հրատարակչությունը կարճ ժամանակում կարողացել է շատերի համար դառնալ «պատուհան» դեպի հայկական գրականություն, քանի որ զբաղվում է հայ դասականների, հայոց պատմության և Հայոց ցեղասպանության վերաբերյալ բազմաթիվ գրքերի թուրքերեն թարգմանությամբ՝ հասանելի դարձնելով այն թուրքական հասարակության բոլոր խավերին:

Հրատարակչությունն ունի նաև արևմտահայերենով հրատարակված գրքեր: