Փարիզում հայտնվել են առաջին անվարորդ ավտոբուսները

12:33 • 24.01.17

Փարիզի իշխանությունները քաղաքում էլեկտրական շարժիչներով երկու անվարորդ փոքր ավտոբուս են գործարկել: Այդ նախագիծը դեռ համարվում է փորձարարական, բայց դրա հաջողության դեպքում քաղաքային իշխանությունները պատրաստ են զարգացնել այդ տրանսպորտային միջոցը, գրում է BBC-ի ռուսական ծառայությունը:


Երկու ավտոբուսները շարժվում են կարճ երթուղով՝ բացառապես առանձնացված գծով, որով չի երթևեկում այլ տրանսպորտ:


Յուրաքանչյուր ավտոբուս կարող է տեղավորել 12 մարդու: Այն ունի լազերային հեռաչափեր և ամբողջ պարագծով տեղադրված բազմաթիվ տեսախցիկներ՝ մարդկանց և մեքենաների հետ բախումները կանխելու համար:


Ավտոբուսները չունեն ոչ միայն վարորդ, այլև վառ արտահայտված առաջնային և հետևի հատված: Հասնելով նշանակետին՝ այն կարող է առանց շրջվելու անմիջապես հետ շարժվել:


Փարիզի քաղաքապետի տեղակալ Ժան-Լուի Միսիկան հայտարարել է լրագրողներին, որ անվարորդ տրանսպորտային միջոցները շուտով հեղափոխություն կգործեն քաղաքային տրանսպորտի աշխարհում և ամբողջությամբ կփոխեն մեծ քաղաքներում մարդկանց կյանքը:


Հեռանկարում քաղաքային իշխանությունները հույս ունեն նման ավտոբուսներով փոխարինել գնացքները, որոնք կապում են Փարիզի մոտակայքում գտնվող փոքր քաղաքները մեգապոլիսի հետ:


Փորձարկման արդյունքներն ամփոփվելու են երեք ամսից: