Մեքսիկայի նախագահը չի բացառում ԱՄՆ այցի չեղարկումը Թրամփի վերջին հրամաններից հետո

10:53 • 26.01.17

Մեքսիկայի նախագահ Էնրիկե Պենյա Նյետոն կարող է չեղարկել հունվարի 31-ին նախատեսված Վաշինգտոն այցը երկու երկրների սահմանին պատի կառուցումը սկսելու մասին ԱՄՆ նախագահ Դոնալդ Թրամփի որոշումից հետո, գրում է Associated Press-ը:


Չորեքշաբթի ԱՄՆ նախագահ Դոնալդ Թրամփը հայտարարել էր, որ ԱՄՆ ներքին անվտանգության նախարարությունն անմիջապես կսկսի Մեքսիկայի հետ սահմանին պատի կառուցումը: Պատի կառուցման նախագծի շրջանակում նախապատրաստական միջոցառումները պետք է ավարտվեն 180 օրվա ընթացքում:


«Պատ կառուցելու մասին Դոնալդ Թրամփի հրամանից հետո Մեքսիկայի նախագահը դիտարկում է Վաշինգտոն այցի չեղարկումը»,- գործակալությանը հայտնել է տեղեկացված աղբյուրը:


Մեքսիկայի նախագահը չորեքշաբթի երեկոյան հայտարարել է նաև, որ իր երկիրը ոչինչ չի վճարելու ԱՄՆ-ի հետ սահմանին պատի կառուցման համար:


«Ես ցավում և դատապարտում եմ պատի կառուցման որոշումը, Մեքսիկան չի՛ հավատում պատերին, Մեքսիկան չի՛ վճարի ոչ մի պատի համար»,- հայտարարել է Պենյա Նյետոն ժողովրդին ուղղված տեսաուղերձում:


Նա նաև հայտնել է, որ հրահանգել է երկրի ԱԳՆ-ին ուժեղացնել ԱՄՆ-ում հայրենակիցների պաշտպանությունը:


Իր վերջին հարցազրույցներից մեկում Թրամփը նշել էր, որ սկզբից ԱՄՆ-ն կկառուցի պատը, իսկ այնուհետև հարևաններից փոխհատուցում կպահանջի: