Լապշինի հարցով աշխատանքներ են տարվում հեղինակավոր կազմակերպությունների հետ. ՀՀ ՄԻՊ

14:22 • 02.02.17

ԶԼՄ-ների ազատության հարցերով ԵԱՀԿ ներկայացուցչի՝ ՀՀ մարդու իրավունքների պաշտպանին ուղղված նամակում մի քանի շեշտադրում կա բլոգեր Ալեքսանդր Լապշինին Ադրբեջան արտահանձնելու հարցով:

Այս մասին այսօր կառավարությունում լրագրողների հետ զրույցում ասաց ՀՀ ՄԻՊ Արման Թաթոյանը՝ անդրադառնալով Լապշինի հարցով միջազգային արձագանքին` մարդու իրավունքների տեսանկյունից:

«Մինսկում Ալեքսանդր Լապշինի ձերբակալման վերաբերյալ Դունիա Միյատովիչի նամակում մի քանի շեշետադրում կա։ Առաջինն այն է, որ արտահանձնումը կարող է լուրջ խնդիրներ ստեղծել մարդու իրավունքների, լրագրողական աշխատանքի, և նրա ձևակերպմամբ՝ հակամարտության հետ կապված: Մյուս շեշտադրումն այն է, որ եթե Լապշինին արտահանձնեն Ադրբեջանին, ապա նրան սպառնում է ծանր պատիժ, իսկ դա կարող է դիտվել վրեժխնդրություն լրագրողական գործունեության համար»,-ասաց Թաթոյանը:

ՄԻՊ-ը հայտնեց, որ շատ ակտիվ աշխատանքներ են տարվում հեղինակավոր կազմակերպությունների հետ, որոնց հետ Արման Թաթոյանն առաջիկայում հանդիպումներ կունենա:

Հարցին, թե արդյո՞ք այդ աշխատանքները լավ ավարտ կունենան, Արման Թաթոյանն ասաց, որ ինքը չի կարող երաշխավորել, սակայն գնահատականներ ամեն դեպքում կան:

Արման Թաթոյանն ասաց, որ իր խնդիրն է՝ առաջ քաշել մարդու իրավունքների ազատության հարցը, բացի այդ՝ կարևորել նաև լրագրողների և փորձագետների աշխատանքն Արցախում, որովհետև դրանք կանխարգելիչ նշանակություն ունեն Ադրբեջանի գործողությունների վրա:

Հարցին, թե Արման Թաթոյանը համամիտ չէ՞, որ հայտարարություններից զատ այլ քայլեր ևս պետք է արվեն, ՄԻՊ-ն ասաց, որ սովորաբար հայտարարություններին նախորդում է հսկայածավալ աշխատանք:

Հիշեցնենք, որ հայտնի բլոգերն Արցախ այցելելուց հետո հայտնվել էր Ադրբեջանի «սև ցուցակում», ապա այցելել էր Բաքու՝ ուկրաինական անձնագրով: Լապշինը նաև իր բլոգում հրապարակումներ էր կատարել Ադրբեջանի մասին՝ ներկայացնելով խնդիրները:

Այսպիսով՝ որոշում է կայացվել Ադրբեջանի քրեական օրենսգրքի 281.2 (պետությունների դեմ հրապարակային կոչեր) և 318.2 (Ադրբեջանի Հանրապետության պետական սահմանի անօրինական հատում) հոդվածներով քրեական պատասխանատվության ենթարկել բլոգերին:

Բելառուսի Հանրապետության գլխավոր դատախազի տեղակալը որոշում է կայացրել բավարարել Ադրբեջանի գլխավոր դատախազության խնդրանքը՝ Ռուսաստանի և Իսրայելի քաղաքացի, բլոգեր Ալեքսանդր Լապշինին Ադրբեջանին արտահանձնելու վերաբերյալ: