Թրամփն առաջարկել է ԱՄՆ զորքը Մեքսիկա ուղարկել՝ «վատ տղաներին» սանձահարելու համար

10:23 • 02.02.17

Միացյալ Նահանգների նախագահ Դոնալդ Թրամփը հեռախոսազրույց է ունեցել իր մեքսիկացի գործընկերոջ՝ Էնրիկե Պենյա Նյետոյի հետ, որի ընթացքում հայտարարել է, որ պատրաստ է ամերիկյան զորքերն ուղարկել հարևան երկիր՝ այնտեղի «վատ տղաներին» սանձահարելու համար:

Այս մասին հաղորդում է Associated Press-ը՝ նկատելով, որ պարզ չէ, թե ում է նկատի ունեցել ԱՄՆ նախագահը՝ «վատ տղաներ» ասելով:

«Դուք այդտեղ շատ վատ տղաներ ունեք ու բավականաչափ ջանք չեք գործադրում նրանց կանգնեցնելու համար: Կարծում եմ, որ ձեր զինվորականները վախեցած են, իսկ մեր բանակը չի վախենում: Ուստի՝ կարող եմ նրանց այդտեղ ուղարկել, որպեսզի նրանք այդ ամենի մասին հոգ տանեն»,-ասել է Թրամփը:


Մեքսիկական կողմը հաստատել է, որ 2 երկրների նախագահների միջև նման հեռախոսազրույց է տեղի ունեցել՝ հերքելով, որ ամերիկյան զորքեր ուղարկելու մասը որպես սպառնալիք է հնչել Թրամփի կողմից:

Նյետոյի մամուլի խոսնակի փոխանցմամբ՝ Թրամփը ոչ թե սպառնալից, այլ հարգալից տոնով է խոսել մեքսիկացի գործընկերոջ հետ: