Լիտվացուն ԱՄՆ-ում մեղադրում են ավելի քան 100 մլն դոլարի կիբեռխարդախության համար

Նյու Յորքի Հարավային շրջանի դատախազությունն ու Հետաքննությունների դաշնային բյուրոյի նյույորքյան գրասենյակը մեղադրանք են ներկայացրել Լիտվայի քաղաքացի Էալդաս Ռիմասաուսկասի դեմ՝ ավելի քան 100 մլն դոլարի կիբեռխարդախություն իրականացնելու համար:

Ինչպես նշում է justice.gov-ը, կասկածյալը հաքերային հարձակում է իրականացրել ու կոտրել ամերիկյան 2 ինտերնետ ընկերությունների էլեկտրոնային փոստերը, ինչից հետո դրանք լիտվացու հաշվին են փոխանցել ավելի քան 100 մլն դոլար:

Դատախազության տվյալներով՝ կասկածյալը Լիտվայում գրանցել է համակարգչային ընկերություն, որի անվանումը կրկնօրինակել է Ասիայում լայն ճանաչում ունեցող ընկերությունից: Այնուհետև նա որպես թիրախ ընտրված 2 ամերիկյան ընկերություններին նամակներ է ուղարկել՝ պահանջելով իր հաշվեհամարին փոխանցել այն գումարները, որոնք ամերիկացիները պարտք էին իրական՝ ասիական ընկերությանը:

Աղբյուրը մանրամասնում է, որ առայժմ հայտնի չէ, թե որ ընկերություններն են դարձել լիտվացու խարդախության զոհը, այնուհանդերձ՝ նշվում է, որ խոսքը վերաբերում է խոշոր անդրազգային ընկերություններին:

Հայտնի է, որ Ռիմասաուսկասը նաև կեղծել է հաշիվ-ապրանքագրերը, նամակներն ու պայմանագրային թղթաբանությունը:

Այժմ Լիտվայում ձերբակալված Ռիմասաուսկասին սպառնում է 20 տարվա ազատազրկում: