Դուբայն արհեստական ինտելեկտ կներդնի կառավարական հաստատություններում

Դուբայում արհեստական ինտելեկտի լաբորատորիան շուտով կսկսի մասնավոր սեկտորի և կառավարական մարմինների աշխատակիցների վերապատրաստումը՝ նրանց աշխատանքում ռոբոտներ ներդնելու համար, հայտնում է «ՌԻԱ Նովոստի»-ն:

Լաբորատորիան բացվել է երկուշաբթի և արդեն ապրիլին կսկսի վերապատրաստել 200 մարդու: Այն նաև մշտապես բաց կլինի գիտնականների, ուսանողների և բոլոր ցանկացողների համար:

«Առաջ շարժվելու համար մենք պետք է վերանայենք կառավարության աշխատանքը և արհեստական ինտելեկտ ներդնենք մեր ծառայություններում: Մենք այլ ընտրություն չունենք, քան ընդունել այդ տեխնոլոգիան: Մենք ցանկանում ենք փոխարինել զանգերի կենտրոնները և օգնել ծնողներին ընտրել երեխաների համար դպրոցները կոգնիտիվ հաշվարկների օգնությամբ»,- հայտարարել է Դուբայի Smart Dubai Office ղեկավար Աիշա բին Բուտի բին Բիշրը:

Ծրագրի ստեղծողների կարծիքով՝ այդ հաստատությունների աշխատանքում նոր տեխնոլոգիաների ներդրումը զգալիորեն կհեշտացնի այն: