Եղանակն՝ այսօր
«Զոմբիները» դուրս են եկել Համբուրգի փողոցներ՝ բողոքելով G20 գագաթնաժողովի դեմ (լուսանկարներ, տեսանյութ)
Զոմբիների կերպարով հարյուրավոր ցուցարարներ դուրս են եկել Համբուրգի փողոցներ՝ բողոքելով քաղաքում ուրբաթ կայանալիք G20 գագաթնաժողովի դեմ, հայտնում է Newsweek-ը:
Փերֆորմանսի մասնակիցները ոտքից գլուխ ծածկված են եղել մոխրագույնով: Նրանք գագաթնաժողովի մեկնարկից մի քանի օր առաջ փոքր խմբերով հայտնվել են քաղաքի փողոցներում` իրենց լուռ սարսափազդու տեսքով:
Չորեքշաբթի մոտ հազար «զոմբի» քայլել է քաղաքի բոլոր կողմերից դեպի կենտրոնական հրապարակ: Այնտեղ հավաքվելուց հետո «զոմբիները» սկսել են պարել և հանել իրենց մոխրագույն հագուստը՝ մնալով կամ գունավոր հագուստով, կամ մերկ մարմնով:
Փերֆորմանսը, որը կազմակերպել էր «1000 Gestalten» անունով խումբը, նախատեսված է եղել որպես բողոք քաղաքական անտարբերության դեմ: Բողոքի մասնակիցները նշել են, որ իրենց ակցիայով ցանկանում են սովորական մարդկանց քաղաքականության մեջ ներգրավվելու ուղերձ հղել:
«Մեր փերֆորմանսի նպատակը մարդկանց սրտերը շարժելն է, նրանց դրդել ներգրավվել քաղաքական գործընթացներում»,- ասել է ակցիայի կազմակերպիչներից Կատալինա Լոպեսը:
Newsweek-ը հիշեցնում է, որ Գերմանիայի՝ մեծությամբ երկրորդ քաղաք G20 գագաթնաժողովին մասնակցելու համար նախատեսվում է համաշխարհային առաջնորդների, այդ թվում՝ Դոնալդ Թրամփի, Վլադիմիր Պուտինի և Ռեջեփ Թայիփ Էրդողանի ժամանումը:
Studio One