Կիմ Չեն Ընը ճոխ խնջույք է կազմակերպել միջմայրցամաքային բալիստիկ հրթիռի առաջին բարեհաջող փորձարկման առիթով (լուսանկարներ, տեսանյութ)

Հյուսիսային Կորեայի առաջնորդ Կիմ Չեն Ընը մասնակցել է հուլիսի սկզբին միջմայրցամաքային բալիստիկ հրթիռի առաջին բարեհաջող փորձարկման կապակցությամբ կազմակերպված ճոխ խնջույքին:

Ինչպես նշում է The Daily Mail-ը, միջոցառման ժամանակ հյուսիսկորեացի առաջնորդին ուղեկցել է 27-ամյա կինը, որը հանրության մեջ է հայտնվել վերջին 4 ամսում առաջին անգամ։

Ստորև ներկայացված լուսանկարներում երևում է, որ Կիմ Չեն Ընի և նրա կնոջ առջևի սեղանին սննդից ու խմիչքից զատ դրված են նաև արձակված հրթիռի փոքրիկ տարբերակները:

Աղբյուրը մանրամասնում է, որ երբ զույգը դահլիճ է մտել, հարյուրավոր ներկաներ ոտքի են կանգնել ու ծափահարել են: Որոշ ժամանակ անց Կիմ Չեն Ընը բաժակ է բարձրացրել հրթիռի հաջող փորձարկման համար:

Ինչպես ավելի վաղ հայտնել էր Tert.am-ը, հուլիսի 3-ին Հյուսիսային Կորեայի կողմից արձակված բալիստիկ հրթիռն անցել է ավելի քան 930 կմ ու ընկել Ճապոնական ծովը:

Հյուսիսային Կորեայի կենտրոնական հեռուստատեսությունը հայտարարել է «Հվասոն-14» միջմայրցամաքային բալիստիկ հրթիռի առաջին հաջող փորձարկման մասին: Հայտարարությունում նշվում է, որ 39 րոպեի ընթացքում այն անցել է 933 կիլոմետր:

Հրթիռի արձակման մասին հրամանը տվել է ԿԺԴՀ առաջնորդը: Նա նաև հետևել է փորձարկմանը:

Ինչպես հայտնել են Ճապոնիայի պաշտպանության նախարարությունից, հրթիռն ընկել է Ճապոնական ծովը՝ Ակիտա պրեֆեկտուրայում Օգա թերակղզուց 300 կիլոմետր հեռավորության վրա: Ճապոնիայի պաշտպանական գերատեսչությունը նաև հայտնել է, որ հրթիռի թռիչքի բարձրությունը գերազանցել է 2500 կիլոմետրը:

Դրանից հետո ՄԱԿ-ում ԱՄՆ մշտական ներկայացուցիչ Նիքի Հեյլին հայտարարել էր, որ Վաշինգտոնը պատրաստ է գործի դնել բոլոր հնարավոր միջոցները, այդ թվում՝ նաև ռազմական ուժը, Հյուսիսային Կորեայի վարքը փոխելու համար։