Բելգիայի իշխանությունները հերքել են Քադաֆիի ընտանիքին պատկանող սառեցված հաշիվներից միլիարդների անհետացումը
Բելգիայի փոխվարչապետ, արտգործնախարար Դիդյե Ռեյնդերսը կեղծ է անվանել բելգիական Euroclear բանկում սառեցված լիբիական հաշիվներից միջոցների «անհետանալու» մասին տեղեկությունը, հայտնում է «ՌԻԱ Նովոստի»-ն:
Լիբիայի դեմ ՄԱԿ-ի պատժամիջոցների շրջանակում սառեցված չորս հաշիվներում 16,1 միլիարդ եվրոյից 10 միլիարդ եվրոյի անհետանալու մասին հայտնել էր Vif բելգիական լրատվամիջոցը:
Լրատվամիջոցի հաղորդմամբ՝ ավելի քան 11 միլիարդ դոլար է անհետացել բելգիական Euroclear բանկի՝ 2011 թվականին սառեցված հաշիվներից, որոնք պատկանում էին ապստամբների կողմից սպանված Լիբիայի առաջնորդ Մուամար Քադաֆիի ընտանիքի համար աշխատող լիբիական ներդրումային կառույցներին:
«Մամուլի ազատություն, իհարկե, կա, բայց երբ տեղեկատվությունը սխալ է, ես ակնկալում եմ, որ դա կշտկվի: Նաև ակնկալում եմ, որ նրանք, ովքեր դա պետական գործ են դարձրել, իրենց հաշիվ կտան, որ այդ տեղեկությունները չեն համապատասխանում ոչ մի բանի»,- հայտարարել է Ռեյնդերսը:
Vif խմբագրությունն ի պատասխան հերքել է փոխվարչապետի կողմից օգտագործված «ֆեյք լուր» եզրը: Լրատվամիջոցը գրում է, որ Բելգիայի ֆինանսների նախարարությունը, որին մարտի 2-ին հարցում է ուղարկվել «անհետացած» 10 միլիարդ եվրոյի մասին, այդ տեղեկությունը փաստացիորեն չի հերքել:
«Մեզ պարզապես պատասխանեցին, որ նախարարությունը միջոցներն ապասառեցնելու թույլտվություն չի տվել՝ առանց հստակեցումների»,- հայտնել են Vif-ում:










