Ինչպես են մոլորակի տարբեր անկյուններում նշել Մարտի 8-ը (լուսանկարներ)
Բրիտանական The Guardian պարբերականն ուշագրավ անդրադարձով պատմել է՝ ինչպես են երեկ աշխարհի տարբեր անկյուններում նշել Կանանց միջազգային օրը՝ Մարտի 8-ը:
Տոնն ուղեկցվել է ոչ միայն տոնակատարություններով, նվերներով, ծաղիկներով ու բարձր տրամադրությամբ, այլև բազմամիլիոնանոց ցույցերով, բողոքի ակցիաներով ու զանգվածային գործադուլներով:
Մասնավորապես՝ Իսպանիայում գնացքների եթևեկությունը դադարեցվել է երկրի պատմության մեջ առաջին ֆեմինիստական գործադուլի հետևանքով: Դրան մասնակցել է ավելի քան 5 մլն կին՝ բարձրաձայնելով ընտանեկան բռնության, սեռական ոտնձգությունների ու տղամարդկանց և կանանց աշխատավարձերի չափի զգալի տարբերության վերաբերյալ խնդիրների մասին:
![]()
Ֆրանսիայում հատուկ այդ օրը կանանց համար զգալի նվազեցվել է տպագիր թերթերի գինը: Բացի այդ, կին ցուցարարները պահանջել են հավասարեցնել իգական և արական սեռերի աշխատավարձերը: Հետազոտությունները ցույց են տվել, որ Ֆրանսիայում միևնույն գործն անող կանայք տղամարդկանցից 24%-ով պակաս են վարձատրվում:

Հնդկաստանում իգական սեռի ներկայացուցիչները մի շարք խոշոր քաղաքներում բողոքի զանգվածային ակցիաներ են անցկացրել: Նույնը տեղի է ունեցել նաև հարևան Բանգլադեշի, Նեպալի, Բելառուսի ու Թուրքիայի քաղաքներում:

Մինչդեռ ՄԱԿ-ում բարձրացվել է Wikipedia առցանց հանրագիտարանում գենդերային անհավասարության հարցը: Կանանց պնդմամբ՝ Wikipedia-ում տղամարդկանց մասին հոդվածները քառակի շատ են իգական սեռի ներկայացուցիչների մասին նյութերից:

Իռլանդիայում քննարկվել է սահմանադրական այն կետի չեղարկումը, համաձայն որի կանանց արգելվում է հղիությունն արհեստական ճանապարհով ընդհատել:

Ինչ վերաբերում է «կանաչ մայրցամաք» Ավստրալիային, ապա այնտեղ անցկացվել են ցույցեր, տեղադրվել են գովազդային վահանակներ՝ կանանց դեմ ընտանեկան բռնությանն ու աշխատավայրում գենդերային անհավասարության երևույթին վերջ տալու կոչերով:

Հարավային Կորեայում հարյուրավոր սևազգեստ կանայք և տղամարդիկ #MeToo գրությամբ պաստառներով ցույց են անցկացրել մայրաքաղաք Սեուլում: Նրանք բողոքել են կանանց նկատմամբ սեռական ոտնձգությունների դեմ:

Ֆիլիպիններում հարյուրավոր ակտիվիստներ բողոքել են երկրի նախագահ Ռոդրիգո Դուտերտեից, որը համարվում է Ասիայում կանանց իրավունքների գլխավոր ոտնահարողներից մեկը:











