Նյու Յորքում ուղղաթիռն ընկել է գետը. կան զոհեր (տեսանյութ)

09:42 • 12.03.18

Մարտի 11-ի երեկոյան Նյու Յորքի Մանհեթեն թաղամասում Իսթ Ռիվեր նեղուցն է ընկել Eurocopter AS350 ուղղաթիռը, ինչի հետևանքով գրանցվել է 2 զոհ:

Ինչպես նշում է The Guardian-ը, այս մասին հայտարարել է Նյու Յորքի քաղաքապետի մամուլի քարտուղար Էրիկ Ֆիլիպսը:

«Առնվազն մեկ մարդ ողջ է մնացել, առնվազն 2-ը զոհվել է: Ջրասուզորդները դեռևս ջրում են»,-ասվում է նրա թվիթերյան գրառման մեջ:

Ավելի ուշ Նյու Յորքի իշխանությունները հայտարարել են, որ միջադեպի հետևանքով հոսպիտալացվել է 3 մարդ: Բժիշկները նրանց վիճակը գնահատել են ծանր:

Ընդհանուր առմամբ, ուղղաթիռում գտնվել է 6 մարդ: Օդաչուին հաջողվել է ինքնուրույն դուրս գալ ուղղաթիռից: Նա ևս հոսպիտալացվածների ցանկում է:

Ոստիկանության փոխանցմամբ՝ ինքնաթիռն իրականացնում էր մասնավոր չվերթ: