ԱՄՆ իշխանությունները պատրաստվում են մինչև 20 հազար ներգաղթյալի տեղավորել ռազմաբազաներում. NYT
Հինգշաբթի Պենտագոնի ներկայացուցիչ Մայքլ Էնդրյուսը հայտնել է, որ ԱՄՆ-ն պատրաստվում է մինչև 20 հազար ներգաղթյալ երեխայի ապաստան տալ չորս ամերիկյան ռազմաբազաներում, գրում է The New York Times-ը:
Մոտ 20 հազար մարդու համար մահճակալ կտեղադրվի Տեխասում և Արկանզասում գտնվող ռազմաբազաներում: Ինչպես գրում է լրատվամիջոցը, պարզ չէ, թե արդյոք ռազմաբազաներում տեղակայվելու են նաև երեխաների ծնողները:
Սպիտակ տան, Պենտագոնի և Առողջապահության հարցերով դեպարտամենտի պաշտոնյաները հայտնել են, որ չեն կարող այլ մանրամասներ հայտնել:
Չորեքշաբթի նախագահ Դոնալդ Թրամփը հրամանագիր է ստորագրել, որով հանձնարարել է չբաժանել անօրինական ճանապարհով ԱՄՆ մուտք գործող ընտանիքների անդամներին:
«Հրամանագրում հանձնարարվում է ընտանիքները կալանքի տակ պահել միևնույն վայրում»,- ասված է հոդվածում:
Ներգաղթյալների իրավունքների համար պայքարողները մտահոգություն են հայտնել ռազմական օբյեկտներում նման հսկայական բնակավայրեր ստեղծելու գաղափարի առնչությամբ:
Թերթի մոտավոր տվյալներով՝ այժմ սոցիալական ապաստարաններում պահվում է 12 տարեկանից ցածր ավելի քան 2,3 հազար երեխա:
Հրամանագրով նախատեսվում է շարունակել անօրինական ձևով սահմանը հատող ներգաղթյալների նկատմամբ «զրոյական հանդուրժողականության» քաղաքականությունը և ծնողներին ու երեխաներին միասին ձերբակալել՝ նրանց բաժանելու փոխարեն:
ԱՄՆ իշխանությունների որոշմամբ՝ վերջին շրջանում մոտ 2.000 երեխա է բաժանվել ծնողներից ու խնամակալներից, որոնց հետ ապօրինաբար հատել է ԱՄՆ սահմանը:










