Կերչի նեղուցում տեղի ունեցած միջադեպից հետո ձերբակալված ուկրաինացի նավաստիները վիրավոր են եղել. ռուս պաշտոնյա
Կերչի նեղուցում Ուկրաինայի ռազմածովային ուժերի ու ռուս սահմանապահների միջև տեղի ունեցած միջադեպից հետո ձերբակալված ուկրաինացի նավաստիները վնասվածքներ են ստացել նավի կորպուսի վնասված արտաքին շերտի բեկորներից: Այդ մասին հայտարարել է Ռուսաստանի Դաշնության Անվտանգության դաշնային ծառայության քննչական վարչության ղեկավար Միխայիլ Շիշովը:
Ինչպես հայտնում է «ՌԻԱ Նովոստի» գործակալությունը, Շիշովն ընդգծել է, որ ծովայինների վնասվածքների բնույթը վկայում է այն մասին, որ դրանք նավի կորպուսի վնասված արտաքին շերտի բեկորների հարվածի հետևանք են, և հրազենային վիրավորման հետքեր նրանց մարմնին առկա չեն:
ՌԴ ԱԴԾ-ից նաև տեղեկացրել են, որ կալանավորված բոլոր 24 ուկրաինացի ծովայիններին արդեն այցելել են Ուկրաինայի դեսպանության հյուպատոսները, նրանց նաև քրեական գործի ընթացակարգին համապատասխան տրամադրվել են փաստաբաններ:
Հիշեցնենք, որ նոյեմբերի 25-ի առավոտյան ՌԴ Անվտանգության դաշնային ծառայությունը հայտնել է Ուկրաինայի ռազմածովային ուժերին պատկանող նավերի կողմից ռուսական ջրային սահմանի խախտման մասին: Նշվում է, որ երեք ուկրաինական նավ ուղղություն է վերցրել դեպի Կերչի նեղուց՝ նախապես նավերի անցման համար համապատասխան դիմում չներկայացնելով:
Արդյունքում ռուսական կողմը բեռնանավերով փակել է նեղուցը: Բացի այդ, ռուսական սահմանապահ նավը վնասել է ուկրաինական քարշակին, որը հետևում էր նավերի խմբին: Այնուհետև Ռուսաստանն Ուկրաինայի ռազմածովային ուժերի գործողությունների պատճառով Սու-25 օդանավերը հերթապահության է ուղարկել Կերչի նեղուցի շրջանում:
Կիևը Մոսկվային մեղադրել է բացահայտ ագրեսիվ գործողություններ կատարելու համար: Կիևը նաև հայտնել է Ռուսաստանի կողմից իր նավերի ուղղությամբ կրակ բացելու ու նավերը գրավելու մասին: Ուկրաինայի ռազմածովային ուժերի փոխանցմամբ՝ ռուս սահմանապահները նավերը կանգնեցրել են զենքի կիրառմամբ: Դրա հետևանքով վիրավորվել է 3 ուկրաինացի զինծառայող:










