Մանվել Գրիգորյանի ազատ արձակման դեմ բողոքող քաղաքացիները բացեցին Երևան–Էջմիածին ճանապարհը, տասը ցուցարարի հետ հանդիպելու է Վալերիյ Օսիպյանը (տեսանյութ)
15.56
Երբ ցուցարարները հայտնեցին, որ 16։30-ին բացում են ճանապարհը, տեղում գտնվող փոխոստիկանապետ Աղասի Կիրակոսյանը տեղեկացրեց, որ ՀՀ ոստիկանության պետ Վալերիյ Օսիպյանը պատրաստ է ընդունել տասը ցուցարարի և քննարկել խնդիրն ու նրանց հետագա անելիքների հետ կապված հարցեր։
Ցուցարար Ջիվան Աբրահամյանը դրանից հետո նշեց, որ որպեսզի կանխեն քաոսը, ճանապարհը բացում են հենց հիմա.«Ճանապարհը բացենք, գնանք ոստիկանապետի հետ հանդիպման, այնուհետև պայմանավորվենք որևէ տեղ, որտեղ կհանդիպենք կամ ուղիղ եթերի միջոցով կհայտնենք Վալերիյ Օսիպյանի հետ հանդիպման արդյունքների մասին»։
Ոստիկանության ծառայողներն սկսեցին կարգավորել երթևեկությունն ու ազատել ճանապարհի երթևեկելի մասը։.jpg?1545479861861)
15:44
«Այսօր 16։30 բացում ենք ճանապարհները, ակցիան ավարտվում է, վաղը՝ ժամը 11։00-ին, վերսկսում ենք բողոքի ակցիաները»,- այս մասին հայտնեց բողոքի ակցիայի կազմակերպիչներից Ջիվան Աբրահամյանը։
Նա հայտնեց, որ օրենքի շրջանակներում իրենք պայքարելու են արդարադատության հասնելու համար, դատավորը պատասխանատվություն է կրելու և ևս մեկ անգամ հիշեցրեց, որ իշխանությունը պատկանում է ժողովրդին։
Նրանք նաև ևս մեկ անգամ հիշեցրին,որ իրենց բողոքը Նիկոլ Փաշինյանի դեմ չէ,այն իշխանության դեմ չէ, որին իրենք են բերել իշխանության։

14։59
Ոստիկանության պետության պետի տեղակալ Աղասի Կիրակոսյանը ցուցարարներին հորդորեց ճանապարհը բացել՝ նշելով, որ նրանք խանգարում են մյուսների ազատ տեղաշարժի իրավունքը:
«Ընկերը եկել է, ասում է՝ կինս վատացել է, չեմ կարողանում գնալ, ո՞նց անեմ: Եկեք բոլորս միասին ճանապարհը բացենք, գնանք նստենք զրուցենք»,-ասաց նա:
Ցուցարարները չեն ցանկանում բացել: «Ընկնում ենք անհամար դրության մեջ, Դուք մի խնդրեք, ճանապարհը կես ժամից կբացենք, թե 5 րոպեից»,-ասաց կազմակերպիչներից մեկը:
Ցուցարարները պնդում են, որ ազատության մեջ Մանվել Գրիգորյանը վտանգ է ներկայացնում և կարող է իր մտերիմների հետ զենքով ուժ կիրառել:
Փոխոստիկանապետը նշեց. «Ամենայն պատասխանատվությամբ հավաստիացնում եմ, որ ինքը ոստիկանության հսկողության տակ է, և ոչինչ չի կարող անել»:
Կազմակերպիչներից Ջիվան Աբրահամյան հարցրեց, թե մերձավոր շրջապատին ևս արդյոք վերահսկում են: «Ոստիկանությունը չի թողնի որևէ տեսակի իրավախախտում կատարվի»,-հավաստիացրեց Կիրակոսյանը և կրկին խնդրեց, որ բացեն ճանապարհը: Ցուցարարներ հայտարարեցին, որ ճանապարհը չեն բացի։


14.21
Արմավիրի մարզից «Իմ քայլը» դաշինքից ընտրված պատգամավոր Վիկտոր Ենգիբարյանը հորդորում է բողոքի ակցիայի մասնակիցներին բացել ճանապարհը, քանի որ նրանց պահանջին արձագանք եղել է:
«Իրավական ընթացակարգը պահպանվել է և սա լավագույն արդյունքն էր, որ կարելի էր ակնկալել»,- ասաց նա՝ հղում անելով Գլխավոր դատախազության կողմից ներկայացված հրապարակմանը, որ Գլխավոր դատախազությունը վերաքննիչ բողոք է ներկայացնելու Մանվել Գրիգորյանին գրավի դիմաց կալանքից ազատ արձակելու որոշման դեմ:
Ակցիայի կազմակերպիչներն անդրդվելի մնացին: Ավելին, նրանք փոխեցին պահանջը, և հայտարարեցին, որ գլխավոր դատախազ Արթուր Դավթյանն անձամբ գա և իրենց իրազեկի:

14։17
Էջմիածնում Մանվել Գրիգորյանի ազատման դեմ բողոքի ակցիայի կազմակերպիչներից Ջիվան Աբրահամյանը լրագրողների հետ զրույցում նշեց, որ իրենք տեղյակ են, որ գլխավոր դատախազությունը վերաքննիչ բողոք է ներկայացնելու Մանվել Գրիգորյանին գրավի դիմաց կալանքից ազատ արձակելու որոշման դեմ:
«Բայց մենք պահանջում ենք և խնդրում ենք գլխավոր դատախազը «լայվ» (ուղիղ եթեր- խմբ.) մտնի և նշի, որ միջնորդություն է ուղարկվել Վերաքննիչ դատարան, և հստակ տեսնենք նրա «լայվը» իր կողմից, ինչ-որ լրատվականին չենք ուզում հավատալ, մենք երաշխավորում ենք, որ ճանապարհը կբացենք»,-ասաց նա: 

13:02
Բողոքի ակցիայի մասնակիցների մեջ է նաև նախկին պատգամավոր Հակոբ Հակոբյանը (հայտնի` «Ճոյտ» մականվամբ): «Իհարկե, ես մասնակցում եմ, որտեղ ժողովուրդը, այնտեղ էլ Հակոբյան Հակոբը»,- ասաց նա:
Հարցին, թե նա էլ դեմ է, որ Մանվել Գրիգորյանն ազատության մեջ լինի, Հակոբ Հակոբյանը պատասխանեց, որ, իհարկե, դեմ է: «Ոչ թե ես եմ դեմ, այլ ժողովուրդը, որ այդպիսի մարդ ապրի Էջմիածնում, իրենց կողքին»,- ասաց նա և նշեց, որ Մանվել Գրիգորյանը քաղաքի կեսը սեփականաշնորհել է, մարդկանց տները ձեռքից խլել, սեփականաշնորհել:
12:43
Ցույցի մասնակիցների մոտ քիչ առաջ ժամանեց Էջմիածնի քաղաքապետ Դիանա Գասպարյանը: Նա հետաքրքրվեց, թե ինչ են պատրաստվում անել նրանք:
«Թող դատավորը գա պատասխան տա՝ ինչո՞ւ է թողել»,-ասաց ցույցի մասնակիցներից մեկը:
Նախաձեռնության խմբի անդամներից մեկն էլ ասաց, որ իրենց քաղաքացիական դիրքորոշումն արտահայտելու են այնքան ժամանակ, մինչև դատավորը չգիտակցի, որ «չի կարելի 25 մլն դրամ գրավի դիմաց բաց թողնել հանրության համար վտանգ ներկայացնող մարդուն»:
Դիանա Գասպարյանն արձագանքեց. «Կարող եմ վստահաբար ասել, որ այս բողոքի ձայնը հստակ կառավարություն հասել է: Երբ նա ազատ արձակվեց, ես ունեի տեղեկություն, որ Մանվել Գրիգորյանը Էջմիածին չի մտնելու, շրջանցիկ ճանապարհով նա ուղեկցվել է իր ամառանոց: Հիմա բողոքի ձայնը հասել է տեղ, ես եկել եմ ու վերահաստատում եմ, որ ինչ որոշում էլ կայացնեն՝ ես քաղաքացիների կողքին եմ, մնում է տեսնենք՝ ով է բողոքի հասցեատերը, միգուցե գնանք իրենց մոտ բողոքի ակցիա անելու»,-առաջարկեց քաղաքապետը:
Մասնակիցները նշեցին, որ չեն պատրաստվում ճանապարհը բացել. «Մենք ոչ թե պահանջում ենք, որ նա Էջմիածնում չլինի, այլ ազատության մեջ չլինի»:
«Նախկին ռեժիմի սպասարկող դատավորները պետք է իսպառ վերանան, մեր կոչը դա է, քանի կան նրանք, քաղաքական դիվերսիա են անելու այս իշխանության դեմ: Մենք այս իշխանության կողմնակիցներն ենք, բայց ճնշում ենք գործադրելու արդարադատության վրա»,-ասաց բողոքի մասնակիցներից մեկը՝ պնդելով, որ երկուշաբթի օրն անպայման ցույցը կշարունակեն Արդարադատության նախարարության դիմաց, բայց այսօր չեն պատրաստվում բացել ճանապարհը:
Դիանա Գասպարյանը հավաքվածներին բացատրեց, որ նրա կալանքի միջնորդության փոփոխությունը չի նշանակում, որ Մանվել Գրիգորյանն ազատ է արձակվել և չի դատապարտվելու այլևս:
«Դա ուղղակի արձանագրում ենք, ես նորից եմ ասում, ձեր վրդովմունքը հասկանում եմ, գիտեմ էջմիածինցիների վերաբերմունքը Մանվել Գրիգորյանի նկատմամբ»,-ասաց նա և նշեց, որ իրենք հանկարծ մտավախություն չունենան, թե կարող է իր շուրջը համախմբել և նախկին կարգը վերադարձնել:
«Դուք էլ համամիտ եք, որ Էջմիածնում Մանվել Գրիգորյանը գործոն չէ և չի կարող լինել»,-ասաց նա:
Ցույցի մասնակիցները պնդում են, որ Մանվել Գրիգորյանը վտանգ է ներկայացնում, և եթե քաղաքական առումով գործոն չէ, այդուհանդերձ կարող է այլ զենքի պահեստներ ունենալ, զինել որոշ մարդկանց և որոշակի գործողություններ անել քաղաքի դեմ: Քաղաքապետը կոչ արեց նման հայտարարություն չանել, և չկա նման ինֆորմացիա, որ կարող է նման բան անել: «Դեռ ազատ չէին արձակել, իր ճտերը արդեն քաղաքում շամպայն էին տրաքացնում, գոռում էին»,-ասացին բողոքի մասնակիցները:

12:16
Միջպետական ճանապարհին վարորդների ու ակցիայի մասնակիցների միջև ժամանակ առ ժամանակ վիճաբանություններ են լինում: Վարորդները պահանջում են ճանապարհը բացել, ակցիայի մասնակիցներն առաջարկում են ոտքով անցնել բարիկադների մյուս կողմը, իրենց տաքսի ծառայության մեքենայով կճանապարհեն:
«Անունը դրել են գրավ ու ազատ են արձակում, նույն կաշառքը չի՞ դա, չեմ հասկանում, հասարակ գյուղացու համար ի՞նչ կապ ունի կաշառք է, թե ինչ, մի բան գիտեմ. փաստի վրա բռնել ես՝ դատի ուրեմն, դրել երկարացանում ես»,-ասաց ակցիայի մասնակիցը: 

12:00
Բողոքի ակցիայի մասնակիցները փակել են նաև Երևան-Էջմիածին տանող ճանապարհը: Նրանց պահանջին՝ կրկին կալանավորել Մանվել Գրիգորյանին, ավելացել է ևս մեկը՝ զրկել նրան գեներալի կոչումից:
«Մենք թույլ չենք տա դիկտատորին ազատ արձակել, նա վտանգ է ներկայացնում հանրության համար: Մեր դիրքորոշումն այն է, որ այնքան ենք պայքարելու, ինչքան Մանվել Գրիգորյանն ազատության մեջ է: Մենք այս հեղափոխության համար պայքարել ենք, բայց արդարադատությունը կառավարության թիկունքից խփում է նման որոշումներով»,-ասաց ակցիայի մասնակիցներից մեկը:
Մեկ ուրիշն էլ հավելեց, թե միայն այն «տուշոնկաները» չէ, որ նա թալանել է. «Քսան տարի կերել են էս ժողովրդին, թալանել են, դե թող գաղութներից, բերդերից բոլորին ազատ արձակեն, հազարավոր հիվանդներ կան»:
10:52
Էջմիածնում երեկ գիշերվանից շարունակվում են գեներալ–լեյտենանտ Մանվել Գրիգորյանին գրավի դիմաց ազատ արձակելու որոշման դեմ բողոքի ակցիաները։ Ակցիայի մասնակիցները պահանջում են, որպեսզի Մանվել Գրիգորյանը կրկին կալանավորվի:
Այս պահին փակ են քաղաքի կենտրոնական փողոցները, հրապարակը: Ակցիայի մասնակիցներին են միանում են նաև մեքենաների վարորդները: Կան նաև վարորդներ, որոնք ճանապարհը փակած քաղաքացիների հետ վիճում են:
Ոստիկանությունը հերթապահություն է իրականացնում տեղում` թույլ չտալով բախումներ:
Հիշեցնենք, որ գեներալ-լեյտենանտ Մանվել Գրիգորյանը 25 մլն դրամ գրավի դիմաց երեկ գիշեր ազատ է արձակվել կալանքից։
Սեպտեմբերին Մանվել Գրիգորյանի նկատմամբ նշանակված բժշկական փորձաքննության արդյունքում նրա մոտ հայտնաբերվել է 16-ից ավելի հիվանդություն, այդ թվում` քաղցկեղ և շաքարային դիաբետ:
Մանվել Գրիգորյանի առողջական վիճակի մասին մտահոգություններ էր ներկայացրել Մարդու իրավունքների պաշտպան Արման Թաթոյանը, նրա խոսքով՝ բացահայտվել է Մանվել Գրիգորյանի առողջական և հոգեբանական վիճակի բացասական դինամիկա: Արման Թաթոյանը նաև նշել էր, որ Մանվել Գրիգորյանի հետ առանձնազրույցի արդյունքում համապատասխան գրություն են ուղարկել թե՛ իրավապահներին, թե՛ Արդարադատության նախարարություն:
Հիշեցնենք, որ դեկտեմբերի 12-ին Երևանի ընդհանուր իրավասության դատարանը Մանվել Գրիգորյանի խափանման միջոց կալանքը ևս երկու ամսով երկարացրել էր: Դատարանը Մարինե Մելքոնյանի նախագահությամբ բավարարել էր նախաքննական մարմնի միջնորդությունը:
Մանվել Գրիգորյանը մեղադրվում է ապօրինի կերպով ռազմամթերք ձեռք բերելու և պահելու, ինչպես նաև առանձնապես խոշոր չափերով գույք հափշտակելու մեջ։ Նա կալանավորվել է այս տարվա հունիսին, դատարանը արդեն երրորդ անգամ էր նրա կալանքի ժամկետը երկարացրել:










