Ճապոնիայի կայսրը տոնում է ծննդյան 85-ամյակը
Ճապոնիայի կայսր Ակիհիտոն տոնում է ծննդյան 85-ամյակը: Այս մասին հաղորդում է ՏԱՍՍ գործակալությունը:
Կայսեր ծննդյան տարեդարձը Ճապոնիայում նշվում է որպես ազգային տոն: Սա Ակիհիտոյի՝ կայսրի պաշտոնում վերջին տարեդարձն է, քանի որ հաջորդ տարի նա պետք է հեռանա գահից:
«Այն փաստը, որ Հեյսեյների դարաշրջանը ավարտին է մոտենում, և որ Ճապոնիան ազատագրված է պատերազմից, ինձ հոգեկան հանգստություն է պարգևում: Մենք պետք է հիշենք Երկրորդ աշխարհամարտի տարիներին կորսված անթիվ կյանքերը և այն, որ ներկայիս աշխարհն ու Ճապոնիայի ծաղկումը կառուցվել է հսկայական զոհերի և հետպատերազմյան շրջանում ճանոպացի ազգի անխոնջ ջանքերի գնով»,- ասել է կայսրը՝ հավելելով, որ իրենք պետք է պատմությունը փոխանցեն պատերազմից հետո ծնված սերունդներին:
Այս տարի Ճապոնիայի կառավարությունը որոշել էր, որ 2019թ.-ի ապրիլի 30-ին Ակիհիտոն կհեռանա գահից, և հենց հաջորդ օրը նրա որդի Նարուհիտոն կդառնա կայսր:
Ներկայումս Ակիհիտոն հանդիսանում է աշխարհում միակ գործող կայսրը։ Նա Ճապոնիայի կայսր է դարձել 1989 թվականի հունվարի 7-ին՝ ճառանգելով գահը հոր մահվանից հետո։ Այդ օրվանից սկսվել է Հեյսեյի նոր ազգային ժամանակագրությունը։










