Պուտինի մամուլի մեծ ասուլիսն ուղիղ հեռարձակմամբ դիտել է մոտ 6,8 մլն ռուսաստանցի

14:43 • 24.12.18

Ռուսաստանի Դաշնության նախագահ Վլադիմիր Պուտինի ամենամյա մամուլի մեծ ասուլիսն ուղիղ հեռարձակմամբ դիտել է մոտ 6,8 մլն ռուսաստանցի, ընդ որում՝ հեռարձակման ընդգրկումը՝ այն մարդկանց միջին թվաքանակը, որոնք ծրագիրը դիտել են 1 րոպեից ավելի, 15 մլն է կազմել: Այս մասին գրում է РИА Новости-ն՝ Mediascope հետազոտական ընկերությանը հղումով:

Հիշեցնենք, որ Պուտինի՝ դեկտեմբերի 20-ին տեղի ունեցած մամուլի մեծ ասուլիսը տևել է 3 ժամ 43 րոպե: Երկրի ղեկավարը պատասխանել է լրատվամիջոցների ներկայացուցիչների 66 հարցի:

Անցած տարի մամուլի ասուլիսն ուղիղ հեռարձակմամբ դիտել էր ավելի քան 7 մլն ռուսաստանցի:

Տարեվերջին մամուլի մեծ ասուլիս անցկացնելու ավանդույթը Պուտինը մտցրել է 2001թ.-ին՝ նախագահական առաջին պաշտոնավարման ժամանակ: