Կառավարությունը 5 միլիարդ 705 միլիոն դրամ հատկացրեց հերթում հաշվառված 1140 նախկին զինվորականի՝ բնակարանային խնդիրների լուծման համար (տեսանյութ)
Այսօր Կառավարությունն իր հերթական նիստին որոշում կայացրեց պահուստային ֆոնդից 5 միլիարդ 705 միլիոն դրամ հատկացնել Պաշտպանության նախարարությանը: Ըստ նախագիծը ներկայացնող Պաշտպանության նախարարի պաշտոնակատար Դավիթ Տոնոյանի՝ գումարը տրամադրվելու է զինվորական ծառայության ընթացքում բնակարանային պայմանների բարելավման կարիք ունեցող և սահմանված կարգով 2018 թվականի դեկտեմբերի 1-ի դրությամբ հաշվառված, սակայն զինվորական ծառայության ընթացքում սեփականության իրավունքով անհատույց բնակարան չստացած և առողջության կամ տարիքի կամ երկարամյա ծառայության զինվորական կենսաթոշակի անցնելու կապակցությամբ զինվորական ծառայությունից սահմանված կարգով արձակված նախկին զինծառայողների ընտանիքների բնակարանային խնդիրների լուծման համար:
Նա նշեց, որ գումարի շահառուներն են հերթում հաշվառված 1140 նախկին զինվորականներ, որոնցից 326-ը ՝ Երևան քաղաքում: «Յուրաքանչյուր շահառուի տրամադրվելու է միջինում հինգ միլիոն դրամ արժեքով բնակարանի գնման վկայագիր»,- ասաց նա:
Հարցին արձագանքեց նիստը վարող առաջին փոխվարչապետի պաշտոնակատար Արարատ Միրզոյանը. «Ստացվում է՝ այն զինծառայողները, ում նկատմամբ պետությունն ուներ բնակարանային պարտավորություն, և խոսվում էր, որ տարիներով սպասում են իրենց բնակարանային հերթին, կարելի է ասել՝ նրանց համար պատուհան է բացվել հարցի լուծման համար, և միջինում հինգ միլիոն տրամադրելով՝ կարող ենք հարցի լուծմանը նպաստել»:
Դավիթ Տոնոյանը հաստատեց և ճշտում արեց, որ այն լինելու է առաջնահերթ այն զորացրվածների համար, որոնք կարիքավոր են, իրենց մեծ մասն արդեն զորացրվել է, սա մեծ առաջընթաց է:
Հարցին անդրադարձավ նաև Արդարադատության նախարարի պաշտոնակատար Արտակ Զեյնալյանը և հարցրեց, թե արդյոք սա նշանակում է, որ մարզերում նրանք կարող են այս գումարով գնել բնակարան, իսկ Երևանում դա լինելու է դրամագլուխ, համավճար, և մնացածը կարող են իրենց միջոցներով իրականացնել, և պետությունն այս մասով իր պարտավորությունը կատարում է, իսկ Դավիթ Տոնոյանը դրական պատասխան տվեց:
«Այս կերպ փորձում ենք բեռնաթափել Երևանի բնակարանային պահանջարկը և հնարավորություն ընձեռել այլ համայնքներում բնակարան ձեռք բերել կամ կառուցել»,- ասաց նա և նշեց, որ եթե նախագիծն ընդունվի, ապա ԶՈՒ-ն ու ՊՆ-ն շատ շնորհակալ կլինեն:










