Իսակովի պողոտայում բախվել են Lexus և Mercedes մակնիշի ավտոմեքենաներ. կա 2 զոհ, 3 վիրավոր, ըստ տեղեկությունների՝ Lexus-ն առևանգված է եղել. Shamshyan.com

11:44 • 27.12.18

Երեկ՝ ժամը 23։30-ի սահմաններում, Ծովակալ Իսակովի պողոտայում՝ Ոստիկանության զորամասի դիմաց, բախվել են Lexus և Mercedes մակնիշի ավտոմեքենաներ։ Վթարի հետևանքով 2 հոգի տեղում մահացել է, 3 հոգի՝ ծայրահեղ ծանր ախտորոշմամբ տեղափոխվել «Աստղիկ» բժշկական կենտրոն։ Այս մասին հայտնում է Shamshyan.com-ը:

Պարզվել է, որ մահացածները Mercedes-ի վարորդ Է. Քոչարյանն է և Գեղարքունիքի մարզի Գեղամասար գյուղի բնակիչ, 43-ամյա Մ. Մելքոնյանը, իսկ վիրավորները՝ 42-ամյա Լուսինե Բաղդասարյանը, Lexus ավտոմեքենայից դուրս բերված, Երևան քաղաքի բնակիչ, 29-ամյա Էդմոն Բաղդասարյանը և Սարգիս Բաբուջյանը։ Նրանց ամբողջական տվյալները ոստիկանությունն ու քննչական բաժինը պարզում են։

Մինչ փրկարարները, ոստիկաններն ու քննիչները վթարի վայրում աշխատանքներ կատարելիս են եղել, մի քաղաքացի ժամը 00։30-ի սահմաններում դիմել է Ոստիկանության Մաշտոցի բաժին և հայտնել, որ որոշ ժամանակ առաջ Լենինգրադյան փողոցում իր Lexus մակնիշի ավտոմեքենան առևանգել են։ Իրավապահները պարզել են, որ խոսքը նշված վթարի մասնակից Lexus-ի մասին է, որի բեռնախցիկում հայտնաբերվել է նաև արտասահմանյան համարանիշներ։

Պարզվել է նաև, որ Lexus-ը օդանավակայանի ուղղությամբ ընթանալիս բախվել է ճանապարհի բետոնե բաժանարար հատվածին, այնուհետև երկաթե գովազդային սյանը և առաջ ընթանալով՝ անցել բետոնե բաժանարար գոտու վրայով՝ հանդիպակաց երթևեկելի գոտի, վթարային իրավիճակ ստեղծել մյուս վարորդների համար, այնուհետև բախվել Mercedes-ին։

Հարուցվել է քրեական գործ:

Ոստիկանությունն ու քննչական բաժինը պարզում են վարորդների, մահացածների, վիրավորների, Lexus-ի սեփականատիրոջ ինքնությունը, ինչպես նաև Lexus-ի սեփականատիրոջ հայտնած տեղեկատվության իսկությունը։

Նյութն ամբողջությամբ կարդացեք սկզբնաղբյուր կայքում: