ԱՄՆ-ի և Մեքսիկայի սահմանին ևս մի փախստական երեխա է մահացել

10:39 • 27.12.18

ԱՄՆ-ի և Մեքսիկայի սահմանին գվատեմալացի փախստական տղա երեխա է մահացել: Սա արդեն ԱՄՆ սահմանին փախստական երեխայի մահվան երկրորդ դեպքն է վերջին մեկ ամսում, փոխանցում է BBC-ն:

Հայտնի է, որ 8-ամյա երեխան, որի ինքնությունը պաշտոնապես հաստատված չէ, ձերբակալվել էր հոր հետ միասին դեկտեմբերի 18-ին՝ Տեխաս նահանգի Էլ Պասո քաղաքի տարածքում՝ երկրի սահմանն ապօրինաբար հատելու փորձի ժամանակ: 

Դեկտեմբերի 22-ին նրանց տեղափոխել են Ալամոգորդո քաղաք: Նշվում է, որ հորն ու երեխային երկու օր պահել են սահմանային պահակակետում: Դեկտեմբերի 24-ին երեխայի մոտ հազ է սկսվել: Նրան տարել են հիվանդանոց, որտեղ բժիշկները եզրակացրել են, որ հազը մրսածության հետևանք է, ու դեղեր են նշանակել երեխային: Երկու ժամ անց երեխան սկսել է կորցնել գիտակցությունը, իսկ ևս երկու ժամ անց մահացել է: Անչափահաս փախստականի մահվան պատճառը դեռևս անհայտ է:

ԱՄՆ սահմանային ու մաքսային վերահսկողության ծառայության կոմիսար Քևին Մաքալինանը երեխայի մահը դժբախտություն է անվանել ու խոստացել, որ իրենք կձեռնարկեն իրենց հսկողության տակ գտնվող փախստական երեխաների հավելյալ բուժստուգումներ:

Հիշեցնենք, որ այս ամսվա սկզբին ԱՄՆ սահմանին ձերբակալվելուց ժամեր անց մահացել էր 7-ամյա աղջիկ: