Ռումինիայում կոմունիզմի սարսափների մասին պատմող թանգարան կբացվի

Ռումինիայի նախագահ Կլաուս Յոհաննիսը հուլիսի 25-ին Բուխարեստում կոմունիզմի սարսափների թանգարան ստեղծելու մասին օրենք է ստորագրել: Այս մասին հայտնել է երկրի ղեկավարի մամուլի ծառայությունը:

Հաղորդվում է, որ թանգարանը կգտնվի խորհրդարանի շենքում:

Մամուլի ծառայության համաձայն՝ այն ցույց կտա «1945-1989 թվականներին Ռումինիայում տիրող սոցիալ-տնտեսական և մշակութային իրականությունը»:

Թանգարանի նպատակը կլինի մարդկանց տեղեկացնել կոմունիստական ռեժիմի ընդդիմախոսների դեմ չարաշահումների, հանցագործությունների, կտտանքների մասին:

Օրենքի տեքստում նշված է, որ թանգարանը կֆինանսավորվի պետական բյուջեից, ինչպես նաև աշխատանքի, նվիրատվությունների և հովանավորությունից ստացված սեփական եկամուտներից:

Կառավարությանը հանձնարարվել է օրենքի ուժի մեջ մտնելուց հետո 120-օրյա ժամկետում պատրաստել Ռումինիայում կոմունիզմի սարսափների թանգարան հիմնելու մասին որոշման նախագիծը: