Դատական համակարգի վրա ճնշումները կշարունակվեն այնքան, մինչև իշխանությունը չհասնի իր նպատակին՝ իրեն ենթարկի դատական համակարգն ամբողջ ծավալով. Արսեն Բաբայան

16:52 • 29.12.19

Մեր երկրում ավելի քան մեկ տարի գործում են երկակի ստանդարտներ, այսինքն՝ մեկին կարելի է թույլ տալ մի բան, որը չի կարելի մյուսին, մեկին ենթարկում են պատասխանատվության, մյուսին երբևէ բան չեն անում:

Այս մասին Tert.am-ի հետ զրույցում ասաց ՀՀ ԱԺ աշխատակազմի ղեկավարի նախկին տեղակալ Արսեն Բաբայանը՝ անդրադառնալով վարչապետի ֆեյբուքյան հրապարակմանը և կից գրառմանը, որում վարչապետը նշել էր, թե այս երկիրը թալանածները, այս իրականությունը կերտածները, «նոտարական գրասենյակներ գողացածները դեռ վնգստում են քաղաքական հետապնդումների մասին»:

Արսեն Բաբայանի խոսքով, այս կերպ խախտվում է իրավական պետության սկզբունքը, չնայած որ ՀՀ վարչապետը բազմիցս հայտարարել էր իրավական պետություն կառուցելու մասին:

«Այո՛, հայտարարել էր, բայց մենք տեսանք, որ մեկուկես տարվա ընթացքում այդ ուղով չենք գնում: Տեսանք հակառակն ապացուցող փաստեր: Բազմաթիվ գործեր, բազմաթիվ երևույթներ, որոնք ապացուցեցին, որ ոչ միայն իրավական պետություն կառուցելու ճանապարհով չենք գնում, այլ եղածն էլ փչացնում ենք»,– ասաց նա:

Արսեն Բաբայանը նկատեց, որ այսպիսի միջոցներով փորձում են դատական իշխանությանը ճնշել, ապա ավելացրեց, որ ճնշումները չեն դադարում և կշարունակվեն այնքան ժամանակ, մինչև իշխանությունը չհասնի իր հիմնական նպատակին՝ ենթարկի դատական համակարգն ամբողջ ծավալով:

«Պատկան մարմինները վախենում են գործողություններ իրականացնել Փաշինյանի դեմ: Խնդիրն այն է, որ իրենք, լինելով գործադիր իշխանության մաս և գտնվելով գործադիրի հովանավորության ներքո, վարչապետի այս հայտարարության համար որևէ գործողություն չեն իրականացնի»,- ընդգծեց Բաբայանը:

Նշենք, որ ՀՀ գլխավոր դատախազի օգնական Գոռ Աբրահամյաննը, անդրադառնալով Նիկոլ Փաշինյանի այդ հայտարարությանը ասել էր, որ վարչապետի այն քաղաքական բնույթի հայտարարություն է։