Մասկը հայտարարել է, որ «Մարսի վրա 10 հազար հրթիռ արձակելը խնդիր չէ»

SpaceX ընկերության հիմնադիր Իլոն Մասկը խնդիր չի համարում Մարսի վրա երկրային կյանքի պայմաններ ստեղծելու նպատակով մոլորակի բևեռներում ջերմամիջուկային պայթյուններ իրականացնելու համար 10 հազար հրթիռի արձակումը: Այս մասին նա գրել է Twitter-ի իր էջում ՝ մեկնաբանելով «Ռոսկոսմոսի» ներկայացուցիչ Ալեքսանդր Բլոշենկոյի՝ Մարսի վրա կլիմայի փոփոխության համար հրթիռների նման քանակության անհրաժեշտության մասին ՏԱՍՍ-ին տված հարցազրույցում արված հայտարարությունը։

«Խնդիր չէ», - գրել է Մասկը:

Ավելի վաղ SpaceX-ի հիմնադիրն առաջարկել էր Մարսի վրա պայմաններ ստեղծել երկրային կյանքի համար՝ մոլորակի բևեռներում ջերմամիջուկային պայթյուններ իրականացնելով: Մասկի գաղափարի համաձայն՝ դա կհանգեցնի սառած ածխաթթու գազի գոլորշիացմանը: Գոլորշիացված գազը մոլորակի մթնոլորտը կդարձնի ավելի խիտ և կհանգեցնի ջերմոցային էֆեկտի, ինչը կհանգեցնի ջերմաստիճանի բարձրացմանը:

Դրան ի պատասխան՝ Բլոշենկոն ՏԱՍՍ-ին տված հարցազրույցում հայտարարել է, որ Մարսի բևեռներում ջերմամիջուկային պայթյունների իրականացման համար կպահանջվի ամենածանր հրթիռների մոտ 10 հազար արձակում: Սակայն, նրա գնահատմամբ, իրականում ինչ-որ շոշափելի ազդեցություն Մարսի կլիմայի վրա մոտ ապագայում մարդկությունն ի զորու չէ ունենալ։