BMW մոտոցիկլներն ինքնուրույն կկարգավորեն արագությունն ու այլ փոխադրամիջոցների հետ հեռավորությունը

Գերմանական BMW ընկերությանը պատկանող BMW Motorrad ստորաբաժանումից հայտնել են մոտոցիկլներում նոր Active Cruise Control (ACC) համակարգի ներդրման մասին. համակարգն ինքնուրույն հսկում է մոտոցիկլի արագությունը, ինչպես նաև դիմացից շարժվող մեքենայից անհրաժեշտ հեռավորություն պահում․ հայտնի է, որ նախկինում այս համակարգը կիրառվել է մեքենաներում, գրում է motor.ru կայքը։

Աղբյուրը մանրամասնում է, որ այս համակարգի ստեղծման աշխատանքներին Bosch ընկերության հետ մեկտեղ մասնակցել են նաև բավարացի ինժեներները։ Նշվում է, որ համակարգը վարորդին թույլ է տալիս դիմացի շարժվող օբյեկտից հեռավորության մի քանի մակարդակ, ինչպես նաև շարժման արագություն ընտրել, որոշել արագացման և դանդաղեցման մակարդակները։

BMW Motorrad–ից նշել են, որ կրուիզային վերահսկողությունը միայն օգնող համակարգ է, որը որևէ կերպ չի ենթադրում անցում ամբողջովին ավտոմատ կառավարման:

«Համակարգը ստեղծված է շարժվող օբյեկտների հետ փոխազդեցության համար, սակայն խաչմերուկներում կամ չշարժվող խոչընդոտների առջև կանգնելու համար վարորդն ինքը պետք է արգելակի»,- պարզաբանել են ընկերությունից։