Մոտ 810 000 հեկտար. այս տարի Կալիֆոռնիայում բռնկված անտառային հրդեհները ռեկորդային մակերեսով հողատարածք են ոչնչացրել (լուսանկարներ)

10:34 • 08.09.20

Այս տարի Կալիֆոռնիայում բռնկված անտառային հրդեհները ռեկորդային մոտ 810 000 հեկտար հողատարածք են ոչնչացրել, գրում է The Hill-ը։

Նախորդ ռեկորդը սահմանվել է 2018 թվականին, երբ Կալիֆոռնիայում ամբողջ տարվա ընթացքում 793 000 հեկտար հողատարածք էր այրվել: Կալիֆոռնիայի անտառային տնտեսության և հակահրդեհային վարչության ներկայացուցիչը Associated Press-ին հայտնել է, որ այն փաստը, որ ռեկորդը սահմանվել է անտառային հրդեհների սեզոնի վաղ շրջանում, արդեն իսկ խիստ մտահոգիչ է։

«Այդ փաստը մտահոգիչ է, քանի որ պատմականորեն սեպտեմբեր ու հոկտեմբեր ամիսները հրդեհների համար վատագույն ամիսներն են»,- ասել է վարչության ներկայացուցիրչը։

Վարչության տվյալներով՝ վերջին երեք շաբաթվա ընթացքում կայծակի ավելի քան 12 000 հարված առաջացրել է գրեթե երկու տասնյակ խոշոր հրդեհներ:

Հրդեհների հետևանքով այրվել են հազարավոր տներ, տեղի են ունեցել էլեկտրաէներգիայի զանգվածային անջատումներ։