Թուրքիան արգելել է իր օդային տարածքով նույնիսկ մարդասիրական օգնություն հասցնել ՀՀ․ 100 տոննա օգնություն է հավաքվել ԱՄՆ-ում, բայց տեղափոխումը հետաձգվել է․ Զարեհ Սինանյան (տեսանյութ)

23:00 • 14.10.20

Սփյուռքի մեր հայրենակիցների կողմից Հայաստան է փոխանցվել արդեն մոտ 700 տոննա հումանիտար օգնություն, «Հայաստան» համահայկական հիմնադրամին փոխանցվել է մոտ 120 մլն դոլար։ Այս մասին Հայկական միասնական տեղեկատվական կենտրոնում այսօր կայացած մամուլի ասուլիսին ասաց Սփյուռքի գլխավոր հանձնակատար Զարեհ Սինանյանը։

«Թուրքաադրբեջանական ահաբեկչական ագրեսիայի սկզբնական պահից ի վեր սփյուռքում տեղի է ունեցել աննախադեպ մոբիլիզացիա։ Մեր հայրենակիցները քաջ գիտակցելով, թե ինչպիսի օրհասական պահ է Հայաստան աշխարհի համար, որքան դժվար է իրավիճակը և ինչ է դրված զոհասեղանանին, լծվել են գործի»,- ասաց նա։

Սփյուռքի կատարած աշխատանքը, Զարեհ Սինանյանի խոսքով՝ մի քանի ուղղություններով է արտահայտվում՝ հումանիտար օգնություն, դրամահավաք, հանրահավաքներ, հասարակական կարծիքի ձևավորում։

«Արդեն Հայաստան է փոխանցվել մոտ 700 տոննա հումանիտար օգնություն աշխարհի տարբեր երկրներից, այս պահին նաև 100 տոննա օգնություն կա ԱՄՆ-ում, որը պատրաստ է ԱՄՆ-ից գալ Հայաստան, սակայն Թուրքիան արգելել է իր օդային տարածքով նույնիսկ մարդասիրական օգնություն հասցնելը, որի հետևանքով այս թռիչքը հետաձգվում է»,- հայտնեց սփյուռքի գլխավոր հանձնակատարը։

Նա նաև տեղեկացրեց, որ «Հայաստան» համահայկական հիմնադրամին մինչև այս պահը հավաքվել է մոտ 120 մլն դոլար․ «Աննախադեպ գումար է հավաքվել։ Կան նաև մեծ գումարներ, որոնք դեռ պետք է ստուգվեն և հաշվվեն կիրակի օրվա հեռուստամարաթոնի արդյունքում։ Այս օգնության կարևորությունը դժվար է թերագնահատել, մենք չգիտենք՝ որքան է տևելու այս պատերազմը և հասկանում ենք, թե ինչպիսի վնասներ է կրել Հայաստան աշխարհը, ենթակառուցվածքները և ձեր օգնությունն ուղղակիորեն կապված է մեր ջանքերի հաջող ավարտի հետ»։

Սփյուռքում գտնվող շատ հայեր էլ իրենց ֆիզիկական ներկայությամբ են աջակցում պայքարին։ Ըստ նրա՝ արդեն բազմաթիվ բժշկական խմբեր են ժամանալ, հիմնականում ՌԴ-ից, ԱՄՆ-ից, Եվրոպայից։

«Ամբողջ սփյուռքում շատ կարևոր է նաև հասարակական կարծիքի ձևավորման մեջ մեր հայրենակիցների դերը, որովհետև այսօր Թուրքիան և Ադրբեջանը ապականել են ամբողջ մեդիան, հասարակական կարծիքը՝ կեղծ տեղեկություններով։ Այս ուղղությամբ էլ մեր սփյուռքի կողմից տարվող աշխատանքը բավականին արդյունավետ է։ Ցույցեր են կազմակերպվել ամենուրեք։ Դրանց նպատակը պետք է լինի՝ Արցախի ճանաչումը տարբեր պետությունների կողմից և երկրորդը՝ թուրք-ադրբեջանական ագրեսիայի դատապարտումը»,- նշեց Զարեհ Սինանյանը։