Ուկրաինան Թուրքիայի հետ ռազմական համագործակցության վերաբերյալ համաձայնագիր կստորագրի

16:28 • 14.10.20

Ուկրաինայի կառավարությունն արտահերթ նիստի ընթացքում հավանություն է տվել Թուրքիայի հետ շրջանակային ռազմական համաձայնագրի ստորագրմանը, հայտնում է Russia Today-ը՝ «112 Ուկրաինա» հեռուստաալիքին հղումով:

«Հոկտեմբերի 15-17-ն Ուկրաինայի նախագահ Վլադիմիր Զելենսկիի՝ Թուրքիա կատարելիք այցի շրջանակում Ուկրաինայի նախարարների կաբինետի և Թուրքիայի կառավարության միջև շրջանակային ռազմական համաձայնագրի նախագծի ստորագրում է նախատեսվում»,- նիստի ընթացքում հայտնել է Ուկրաինայի պաշտպանության նախարար Անդրեյ Տարանը:

Նրա խոսքով՝ փաստաթղթի ընդունումը թույլ կտա ընդլայնել Թուրքիայի հետ համագործակցությունը ռազմական ոլորտի 21 ուղղություններում:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 14-ի դրությամբ Արցախի զինուժը խոցել է հակառակորդի՝ 16 ուղղաթիռ, 19 ինքնաթիռ, 176 անօդաչու թռչող սարք, 521 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 5489 զոհ։ Հայկական կողմից, նախնական տվյալներով, կա 532 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 31 քաղաքացիական անձ, վիրավորվել է 106 քաղաքացիական անձ, նախնական տվյալներով՝ լրջորեն վնասվել է ավելի քան 6700 մասնավոր սեփականության անշարժ գույք, ավելի քան 640 մեքենա, շուրջ 1110 ենթակառուցվածքային, հանրային և արտադրական նշանակության օբյեկտներ:

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։

Հայաստանում և Արցախում սեպտեմբերի 27-ին հայտարարվել է ռազմական դրություն։

Հոկտեմբերի 10-ի ժամը 12:00-ից ուժի մեջ է մտել հրադադարը, սակայն ադրբեջանական զինուժը հրադադարից հետո դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում։