ՀԱՊԿ-ը անդամ պետության տարածքում խաղաղապահներ կարող են տեղակայվել հատուկ դիմումի և ՄԱԿ-ի ԱԽ մանդատի առկայության պարագայում. ՀԱՊԿ մամուլի քարտուղար

21:18 • 14.10.20

Հավաքական անվտանգության պայմանագրի կազմակերպությունը համապատասխան դիմումի դեպքում կկարողանա խաղաղապահ ուժեր ներգրավել ղարաբաղյան հակամարտության գոտում խաղաղության ապահովման գործողություններում՝ միայն ՀԱՊԿ հավաքական անվտանգության խորհրդի որոշմամբ և միայն ՄԱԿ-ի Անվտանգության խորհրդի կողմից համապատասխան մանդատ ստանալու դեպքում:

Ինչպես փոխանցում է ТАСС գործակալությունը, այս մասին հայտարարել է ՀԱՊԿ մամուլի քարտուղար Վլադիմիր Զայնետդինովը՝ պատասխանելով համապատասան հարցին: Վերջինս հավելել է, որ այդ որոշման համար պետք է լինի նաև բոլոր հակամարտող կողմերի համաձայնությունը:

Նա նաև հիշատակել է ՀԱԿՊ խաղաղապահ գործունեության մասին 2007 թվականին կնքված համաձայնագիրը: Նրա խոսքով՝ խաղաղապահ գործունեության ծավալման մասին որոշումը կազմակերպության անդամ երկրների տարածքում ընդունվում է ՀԱԿՊ հավաքական անվտանգության խորհրդի կողմից: 

ՀԱՊԿ կազմում չընդգրկված երկրի տարածքում գործողության անցկացման դեպքում նույնպես պահանջվում է ՄԱԿ-ի Անվտանգության խորհրդի որոշումը: 

«Որոշումն ընդունվում է հաշվի առնելով անդամ պետությունների ազգային օրենսդրությունը՝ պետության պաշտոնական դիմումի հիման վրա իր տարածքում խաղաղապահ գործունեություն իրականացնելու համար»,- ընդգծել է Զայնետդինովը:

Ընդգծվում է, որ հակամարտության գոտում ռազմաքաղաքական իրավիճակի գնահատման համար անհրաժեշտության դեպքում ՀԱՊԿ-ի կողմից հատուկ աշխատանքային խումբ է ստեղծվում:  

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 14-ի դրությամբ Արցախի զինուժը խոցել է հակառակորդի՝ 16 ուղղաթիռ, 19 ինքնաթիռ, 176 անօդաչու թռչող սարք, 521 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 5489 զոհ։ Հայկական կողմից, նախնական տվյալներով, կա 532 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 32 քաղաքացիական անձ, վիրավորվել է 106 քաղաքացիական անձ, նախնական տվյալներով՝ լրջորեն վնասվել է ավելի քան 6700 մասնավոր սեփականության անշարժ գույք, ավելի քան 640 մեքենա, շուրջ 1110 ենթակառուցվածքային, հանրային և արտադրական նշանակության օբյեկտներ:

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։

Հայաստանում և Արցախում սեպտեմբերի 27-ին հայտարարվել է ռազմական դրություն։ Հոկտեմբերի 10-ի ժամը 12:00-ից ուժի մեջ է մտել հրադադարը, սակայն ադրբեջանական զինուժը հրադադարից հետո դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում։