Ավելի քան 76 մլն դոլարի զենք. Ադրբեջանը սեպտեմբերին դարձել է թուրքական զենքի խոշորագույն գնորդը
Թուրքիան սեպտեմբերին ավելացրել է ռազմական և ավիացիոն արտադրանքի արտահանումը և դարձել Ադրբեջանի խոշորագույն մատակարարը, գրում է EAdaily-ն:
Թուրք արտահանողների միության տվյալների համաձայն՝ սեպտեմբերին Թուրքիան օգոստոս ամսվա համեմատ երկրի պաշտպանական և ավիատիեզերական համալիրի արտադրանքի արտահանումն ավելացրել է 80%-ով՝ հասցնելով 282 մլն դոլարի:
Ընդ որում, գնումներ կատարողների շարքում առաջատար է Ադրբեջանը, որը 76,7 մլն դոլարի զենք է ներմուծել: Երկրորդ տեղում է Օմանը՝ 62,9 մլն դոլար, երրորդ տեղում է ԱՄՆ-ն՝ 62,7 մլն դոլար:
Թուրքական պետական «Անադոլու» տեղեկատվական գործակալությունը նշում է, որ Ադրբեջանը Թուրքիայից ռազմական արտադրանքի խոշորագույն գնորդ է նաև ծավալներով: Սեպտեմբերին Ադրբեջանը գնումներով գերազանցել է ԱՄՆ-ին, որն առաջատար էր թուրքական զենքերի ներմուծմամբ:
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Հոկտեմբերի 14-ի դրությամբ Արցախի զինուժը խոցել է հակառակորդի՝ 16 ուղղաթիռ, 19 ինքնաթիռ, 176 անօդաչու թռչող սարք, 521 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:
Հակառակորդն ունի ավելի քան 5489 զոհ։ Հայկական կողմից, նախնական տվյալներով, կա 532 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 31 քաղաքացիական անձ, վիրավորվել է 106 քաղաքացիական անձ, նախնական տվյալներով՝ լրջորեն վնասվել է ավելի քան 6700 մասնավոր սեփականության անշարժ գույք, ավելի քան 640 մեքենա, շուրջ 1110 ենթակառուցվածքային, հանրային և արտադրական նշանակության օբյեկտներ:
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։
Հայաստանում և Արցախում սեպտեմբերի 27-ին հայտարարվել է ռազմական դրություն։
Հոկտեմբերի 10-ի ժամը 12:00-ից ուժի մեջ է մտել հրադադարը, սակայն ադրբեջանական զինուժը հրադադարից հետո դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում։










