«Twitter-ի միջոցով դիվանագիտությունը չի լուծում ղարաբաղյան հակամարտությունը»․ Eurasianet-ի անդրադարձը՝ ԼՂ հարցում ԱՄՆ-ի որդեգրած չեզոք քաղաքականությանը
Այս օրերին, երբ Հայաստանն ու Ադրբեջանը մղում են վերջին երեք տասնամյակների ընթացքում իրենց ամենաարյունահեղ պատերազմը, Միացյալ Նահանգները, կարծես թե, գրեթե ուշադրություն չի դարձնում ծավալվող իրադարձություններին, գրում է Eurasianet-ը։
«Սեպտեմբերի 27-ին վերսկսված ռազմական գործողություններից հետո Վաշինգտոնը բարձր մակարդակով գրեթե որևէ դիվանագիտական միջոց չի ձեռնարկել»,- նշում է հոդվածագիր Ջոշուա Կուչերան՝ ընդգծելով, որ պետքարտուղար Մայք Պոմպեոյի ամենանշանակալի միջամտությունը նախօրեին արված թվիթերյան գրառումն է եղել, որը երկու կողմերին կոչ է անում պահպանել գրեթե գոյություն չունեցող հրադադարը և դադարեցնել քաղաքացիական շրջանների գնդակոծությունը:
«Twitter-ի միջոցով դիվանագիտությունը չի լուծում ղարաբաղյան հակամարտությունը։ Պոմպեոն առնվազն պետք է հեռախոսազրույց ունենար կողմերի հետ»,- ասել է Քարնեգի հիմնադրամի ավագ գիտաշխատող Փոլ Ստրոնսկին։
Ինչպես նշում է հոդվածագիրը, մինչդեռ մյուս համաշխարհային առաջնորդները, ներառյալ՝ Ռուսաստանի նախագահ Վլադիմիր Պուտինը և Ֆրանսիայի նախագահ Էմանուել Մակրոնը, անձամբ են հանդես եկել հակամարտության վերաբերյալ հայտարարություններով, իսկ նրանց ամերիկացի գործընկերը դա չի արել: Պոմպեոյի բացակայության պայմաններում ԱՄՆ-ի դերը վերապահվել է պակաս նշանակալի պաշտոնյաների, ինչպիսիք են՝ ազգային անվտանգության հարցերով խորհրդական Ռոբերտ Օ'Բրայենը և պետքարտուղարի տեղակալ Սթիվեն Բիգուն։
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Հոկտեմբերի 15-ի դրությամբ Արցախի զինուժը խոցել է հակառակորդի՝ 16 ուղղաթիռ, 19 ինքնաթիռ, 176 անօդաչու թռչող սարք, 521 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:
Հակառակորդն ունի ավելի քան 5489 զոհ։ Հայկական կողմից, նախնական տվյալներով, կա 555 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 32 քաղաքացիական անձ, վիրավորվել է 106 քաղաքացիական անձ, նախնական տվյալներով՝ լրջորեն վնասվել է ավելի քան 6700 մասնավոր սեփականության անշարժ գույք, ավելի քան 640 մեքենա, շուրջ 1110 ենթակառուցվածքային, հանրային և արտադրական նշանակության օբյեկտներ:
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։
Հայաստանում և Արցախում սեպտեմբերի 27-ին հայտարարվել է ռազմական դրություն։
Հոկտեմբերի 10-ի ժամը 12:00-ից ուժի մեջ է մտել հրադադարը, սակայն ադրբեջանական զինուժը հրադադարից հետո դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում։










