Թուրքիան ևս մեկ ցեղասպանություն է իրագործում քրիստոնյաների դեմ. «Հանուն քրիստոնյաների պաշտպանության» ՀԿ-ն կոչ է արել պատժամիջոցներ սահմանել Թուրքիայի դեմ
EWTN News Nightly անգլալեզու հեռուստաալիքն անդրադարձել է «Հանուն քրիստոնյաների պաշտպանության» կազմակերպության հայտարարությանը:
Կազմակերպությունն ասուլիս էր կազմակերպել՝ «Թուրքիան ևս մեկ ցեղասպանություն է իրագործում քրիստոնյաների դեմ: Ինչո՞ւ է Թրամփի վարչակազմը լռում» խորագրով՝ պահանջելով ԱՄՆ ղեկավարությունից առավել մեծ ճնշում գործադրել Թուրքիայի վրա:
«Թուրքիան խախտում է կրոնական ազատության միջազգային իրավունքը և պետական մակարդակով աջակցում է քրիստոնյաների հետապնդումներին»,- մեջբերել է հաղորդավար Թրեյսի Սաբոլը:
«Եթե մենք այժմ չբարձրաձայնենք, որ եկեղեցիներ են ռմբակոծվում, որ քաղաքացիներն են ռմբակոծվում, դա վերջ չի ունենա»,- ռեպորտաժի ընթացքում նշել է «Ամերիկյան հելլենիստական խորհրդի» տնօրեն Էնդի Զեմենիդեսը:
Ամերիկյան ձեռնարկությունների ինստիտուտի գիտաշխատող, վերլուծաբան Մայքլ Ռուբինը շեշտել է, որ Թուրքիան ռազմական ուղի է բռնել` փորձելով շեղել հանրության ուշադրությունն իր անկում ապրող տնտեսությունից:
Վերհիշելով, որ միայն Թուրքիայի դեմ պատժամիջոցներն ստիպեցին Էրդողանին ազատ արձակել բանտարկված ամերիկացի քահանա Էնդրյու Բրանսոնին, «Հանուն քրիստոնյաների պաշտպանության» կազմակերպությունը կոչ է արել ամերիկյան իշխանություններին վերականգնել պատժամիջոցները:
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Հոկտեմբերի 18-ի դրությամբ Արցախի զինուժը խոցել է հակառակորդի՝ 16 ուղղաթիռ, 22 ինքնաթիռ, 186 անօդաչու թռչող սարք, 554 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:
Հակառակորդն ունի ավելի քան 6109 զոհ։ Հայկական կողմից, նախնական տվյալներով, կա 673 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 36 քաղաքացիական անձ, վիրավորվել է 115 քաղաքացիական անձ, նախնական տվյալներով՝ լրջորեն վնասվել է ավելի քան 6700 մասնավոր սեփականության անշարժ գույք, ավելի քան 640 մեքենա, շուրջ 1110 ենթակառուցվածքային, հանրային և արտադրական նշանակության օբյեկտներ:
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։
Հայաստանում և Արցախում սեպտեմբերի 27-ին հայտարարվել է ռազմական դրություն։ Հոկտեմբերի 10-ի ժամը 12:00-ից ուժի մեջ է մտել հրադադարը, սակայն ադրբեջանական զինուժը հրադադարից հետո դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում:










