Ադրբեջանին պետք չեն սեփական դիերը․ դիտեցի այն տեսանյութը, թե ինչպես են ճահճուտներում կենդանիները հոշոտում նրանց դիերը․ Արծրուն Հովհաննիսյան

22:49 • 18.10.20

Այս տեղեկությունը շատ խոսուն է այն իմաստով, որ Ադրբեջանին պետք չեն սեփական դիերը, նրանք թքած ունի սեփական կորուստների վրա։ Այս մասին այսօր միասնական տեղեկատվական կենտրոնում կայացած ասուլիսին ասաց պաշտպանության նախարարության ներկայացուցիչ Արծրուն Հովհաննիսյանը՝ անդրադառնալով ադրբեջանական կողմի հայտարարությանը, որ պատրաստ են միակողմանիորեն հայկական կողմին հանձնել զինծառայողների մի մասի դիերը։

«Ես այսօր դիտեցի նաև այն տեսանյութը, որի մասին զորքերից միշտ լսում էի, թե ինչպես են ճահճուտներում կենդանիները հոշոտում ադրբեջանցիների դիակները։ Այնպես որ, զարմանալու ոչինչ չեմ տեսնում (դիերը միակողմանի հանձնելու հարցում – Tert.am)»,- նշեց Արծրուն Հովհաննիսյանը։

Նշենք, որ ՏԱՍՍ գործակալության հաղորդմամբ՝ Ադրբեջանի ռազմագերիների, գերիների և անհետ կորածների հարցերով պետական հանձնաժողովը հայտարարել էր, որ Ադրբեջանը պատրաստ է Կարմիր Խաչի միջազգային կոմիտեի միջնորդությամբ միակողմանիորեն հայկական կողմին հանձնել զոհված զինծառայողների մի մասի դիերը։

Հիշեցնենք, որ նախօրեին Արցախի նախագահի մամուլի խոսնակ Վահրամ Պողոսյանը գրառում էր կատարել, որ հումանիտար զինադադար հայտարարելուց հետո հայկական կողմը պատրաստ է մարդասիրական միջանցք տրամադրել շրջափակման մեջ գտնվող ադրբեջանական զորքերին։

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 18-ի դրությամբ Արցախի զինուժը խոցել է հակառակորդի՝ 16 ուղղաթիռ, 22 ինքնաթիռ, 186 անօդաչու թռչող սարք, 554 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 6109 զոհ։ Հայկական կողմից, նախնական տվյալներով, կա 673 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 36 քաղաքացիական անձ, վիրավորվել է 115 քաղաքացիական անձ, նախնական տվյալներով՝ լրջորեն վնասվել է ավելի քան 6700 մասնավոր սեփականության անշարժ գույք, ավելի քան 640 մեքենա, շուրջ 1110 ենթակառուցվածքային, հանրային և արտադրական նշանակության օբյեկտներ:

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։

Հայաստանում և Արցախում սեպտեմբերի 27-ին հայտարարվել է ռազմական դրություն։

Արդեն երկու անգամ հայտարարվել է մարդասիրական հրադադարի մասին, սակայն ադրբեջանական զինուժը դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում։