«Ղարաբաղ. Սև օրեր». Life.ru-ի նկարահանող խումբը վավերագրական ֆիլմ է պատրաստել պատերազմի կիզակետում գտնվող Ստեփանակերտից
«Ղարաբաղում արկեր են պայթում և մարդիկ են մահանում, հարյուրավոր մարդիկ ստիպված են լքել իրենց տները». Life.ru լրատվական պորտալը վավերագրական ֆիլմ է պատրաստել Արցախում ընթացող պատերազմի մասին: Այս մասին հայտնում է ՌԴ-ում Հայերի միության ֆեյսբուքյան էջը:
«Մեր նկարահանող խումբն Արցախում է եղել ամենադժվար օրերին, երբ մայրաքաղաք Ստեփանակերտը գտնվել է մշտական հրթիռակոծության տակ: Այդ օրերը բնակիչների համար կարելի է անվանել սև օրեր»,- հայտնել են պորտակի թղթակիցները:
Հատուկ թղթակից Արտուր Մատվեևը հենց դեպքի վայրում նկարահանումներ է կատարել՝ ցույց տալով այն ամենն, ինչ տեղի է ունենում վերջին շաբաթներին Ստեփանակերտում. հրթիռային հարվածներ մայրուղու ուղղությամբ, ռմբակոծություն քաղաքի կենտրոնում, օդային տագնապի ազդանշաններ, մինչդեռ քաղաքի բնակիչները հույսով սպասում են ապաստարաններում: Բացի այդ, ֆիլմում տեղ է գտել Ռուսաստանից ինքնաթիռով Արցախ մեկնող հայերի թռիչքը:
Մատվեևը ֆիլմում հայտնում է, որ Արցախում է եղել 2016 թվականի քառօրյա պատերազմի ժամանակ, սակայն նման սարսափի ականատես չի եղել: Վերջինս նաև արխիվային կադրեր է ներկայացրել ապրիլյանի օրերից:
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Հոկտեմբերի 18-ի դրությամբ Արցախի զինուժը խոցել է հակառակորդի՝ 16 ուղղաթիռ, 22 ինքնաթիռ, 186 անօդաչու թռչող սարք, 554 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:
Հակառակորդն ունի ավելի քան 6109 զոհ։ Հայկական կողմից, նախնական տվյալներով, կա 710 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 36 քաղաքացիական անձ, վիրավորվել է 115 քաղաքացիական անձ, նախնական տվյալներով՝ լրջորեն վնասվել է ավելի քան 6700 մասնավոր սեփականության անշարժ գույք, ավելի քան 640 մեքենա, շուրջ 1110 ենթակառուցվածքային, հանրային և արտադրական նշանակության օբյեկտներ:
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։










